Abhijeet-Gautami: गेल्या काही दिवसांपासून सोशल मीडियावर गायक अभिजीत सावंत आणि नृत्यांगना गौतमी पाटील यांचा AI निर्मित व्हिडिओ जबरदस्त व्हायरल होत होता. बीचवरील लोकेशन, दोघांची आकर्षक लूक केमिस्ट्री आणि अचानक समोर आलेला हा व्हिडिओ, यामुळे चाहत्यांमध्ये कुतूहल निर्माण झाले होते. अखेर या गुपिताचा उलगडा झाला असून हा व्हिडिओ त्यांच्या नव्या गाण्याशी संबंधित असल्याची अधिकृत घोषणा करण्यात आली आहे.

अभिजीत सावंत लवकरच ‘रुपेरी वाळूत’ हे नवीन गाणं घेऊन प्रेक्षकांच्या भेटीस येत आहे. या गाण्याची खास गोष्ट म्हणजे, लोकप्रिय नृत्यांगना गौतमी पाटीलही यात मुख्य भूमिकेत दिसणार आहे. दोन वेगवेगळ्या क्षेत्रातील कलाकारांची ही अनपेक्षित जोडी पाहण्यासाठी नेटिझन्स मोठ्या उत्सुकतेने वाट पाहत आहेत.

अभिजीत सावंतने 2025 मध्ये सलग अनेक ट्रेंडिंग गाणी देत प्रेक्षकांची मने जिंकली आहेत. ‘चाल तुरु तुरू’ पासून ते ‘मोहब्बते लुटाऊंगा – जेन झी व्हर्जन’ पर्यंत, त्याचा सदाबहार आवाज आणि आधुनिक साऊंड यांची उत्तम सांगड रसिकांनी मोठ्या उत्साहाने स्वीकारली. त्यामुळे आता ‘रुपेरी वाळूत’ या नव्या गाण्याबद्दल चाहत्यांच्या अपेक्षा अधिकच वाढल्या आहेत.

या गाण्याचा व्हिडिओ नेमका कोणत्या थीमवर आधारित आहे, तो एखाद्या जुन्या गाण्याचा नवा ट्विस्ट असेल की पूर्णत: नवीन कॉन्सेप्ट याबाबत अद्याप उत्सुकता कायम आहे. गाण्याचा लूक पाहता हे गाणं रोमँटिक मूडमध्ये असण्याची दाट शक्यता व्यक्त केली जात आहे.

५ डिसेंबरला हे गाणं अधिकृतरीत्या प्रदर्शित होणार आहे. काही दिवसांपूर्वी शेअर केलेल्या AI व्हिडिओमुळे निर्माण झालेलं रहस्य आणि आज झालेली घोषणा या दोन्हीमुळे सोशल मीडियावर अभिजीत आणि गौतमीच्या कोलॅबबद्दल चर्चांना उधाण आलं आहे. दोघांची जोडी नव्या अंदाजात पाहण्यासाठी प्रेक्षक आणि चाहत्यांमध्ये प्रचंड उत्सुकता निर्माण झाली आहे.