'क्यू की सास भी कभी बहू थी' फेम अभिनेता अमर उपाध्यायची फसवणूक झाली आहे. शेअर मार्केटमध्ये चांगला परतावा मिळवून देण्याच्या आमिषाने एका जोडप्याने अभिनेत्याची तब्बल सव्वा कोटींची फसवणुक केली आहे. याप्रकरणी आरोपी पती-पत्नीविरुद्ध वर्सोवा पोलिसांनी सव्वाकोटीचा अपहार करुन फसवणुक केल्याप्रकरणी गुन्हा दाखल केला आहे.

अभिनेता अमर उपाध्याय याची फसवणूक करणाऱ्या आरोपी जोडप्याचे नाव कुणाल शहा आणि हिनल मेहता आहे. ते दोघेही डायलाईट्स इन्वेस्टमेंट प्रायव्हेट लिमिटेड कंपनीचे संचालक आहेत. या दोघांनी शेअरमध्ये चांगला परतावा मिळवून देतो असे सांगून फसवणुक केल्याचा आरोप आहे.

या प्रकरणी पोलिस अधिकाऱ्यांनी माहिती दिली की, अभिनेत्याने सुरुवातीला २० लाख रुपयांची गुंतवणूक केली होती. यानंतर जर अभिनेत्याने अधिक गुंतवणूक केली तर तो २०२६ पर्यंत ५ कोटी ते १५ कोटी रुपये कमवू शकतो, असं अभिनेत्याने सांगण्यात आले होते. या गुन्ह्यांचा पोलिसांकडून तपास सुरु केला आहे.