राजस्थानमध्ये भयावह अपघात घडला आहे. निबेहेराहून जैसलमेरला जाणाऱ्या प्रवासी बसचा अपघात झाला आहे. चालकाचं गाडीवरील नियंत्रण सुटल्याने ही घटना घडली. या अपघतात दोन निष्पाप मुलींचा जागीच मृत्यू झाला आहे. तर २८ प्रवासी गंभीर जखमी झाले आहेत. जखमींना जवळच्या रुग्णालयात दाखल करण्यात आले आहे. दरम्यान या घटनेने परिसरात भीतीचे वातावरण निर्माण झाले आहे.

मिळालेल्या माहितीनुसार, राजस्थानमधील पाली जिल्ह्यात शनिवारी निबेहेराहून जैसलमेरला एक प्रवासी बस जात होती. या बसमध्ये महिला, मुले आणि वृद्धांसह सुमारे ५० प्रवासी प्रवास करत होते. बस रोहत पोलीस स्टेशन परिसरातील खर्डा गावाजवळ तीव्र वळणावर येताच चालकाचे बस वरील नियंत्रण सुटले आणि गाडीने वेग पकडला. वेगात धावणारी बस पुढे जाऊन पलटी झाली.

अपघातानंतर रोहत पोलिसांनी तात्काळ घटनास्थळी धाव घेतली आणि बचावकार्य सुरू केले. या दुर्घटनेत २८ प्रवासी जखमी झाले. तर दोन निष्पाप मुलींचा दुर्दैवी मृत्यू झाला. या दोन्ही मुली ८ ते १० वर्षांच्या आहेत. जखमींना तात्काळ जवळच्या पाली येथील बांगर रुग्णालयात दाखल करण्यात आले. डॉक्टरांनी सांगितल्याप्रमाणे जखमींपैकी काहींची प्रकृती गंभीर आहे. या घटनेने रस्ते सुरक्षेबद्दल आणि ग्रामीण रस्त्यांच्या स्थितीबद्दल पुन्हा प्रश्न उपस्थित केले आहेत.

पोलिसांच्या प्राथमिक तपासात चालकाचा निष्काळजीपणा आणि बसची खराब स्थिती हे अपघाताचे कारण असल्याचे आढळून आले आहे. चालकाला ताब्यात घेण्यात आले असून बस जप्त करण्यात आली आहे. तसेच पुढील तपास सुरू करण्यात आला आहे. पालीचे एसपी आदर्श सिद्धू आणि एडीएम बजरंग सिंह यांनी जखमींच्या प्रकृतीची विचारपूस करण्यासाठी बांगर रुग्णालयात भेट दिली. एसपी सिद्धू यांनी सांगितले की ते या दुःखद अपघाताची सखोल चौकशी करत आहेत आणि जबाबदार असलेल्यांवर कठोर कारवाई केली जाईल.