छत्रपती संभाजीनगरमधून धक्कदायक बातमी समोर आली. संभाजीनगराच्या एसएफएस शाळेच्या मैदानावर एका तरुणाचा मृतदेह आढळला आहे. या घटनेने परिसर हादरला आहे. पोलीस या घटनेचा आदिक तपास करत असून या तरुणाचा गळा धारदार शस्त्राने चिरून हत्या करण्यात आल्याचं समोर आलं आहे. मृत तरुणाचं नाव सुरेश उंबरकर असे आहे.

मिळालेल्या माहितीनुसार, संभाजीनगर मधील सेंट फ्रान्सिस स्कूल येथील परिसर नेहमीच गजबजलेला असतो. मात्र येथील मैदानावर एका तरुणाचा मृतदेह सापडला आहे. मृतदेहाला पाहता क्षणीच नागरिकांनी पोलिसांना पाचारण केले. पोलिसांनी घटनास्थळी धाव घेत तपास सुरु केला आहे. तपासत तरुणाचे नाव सुरेश भगवान उंबरकर असल्याचे उघडकीस आले आहे.

मृत सुरेश उंबरकर हा कुक म्हणून काम करत होता. तो जाफराबाद येथील रहिवासी असून शहरात भानुदासनगर भागात तो राहत होता. सुरेशची हत्या रात्रीच्या सुमारास धारदार शस्त्राने करण्यात आली असल्याचं पोलीस तपासात उघड झाले आहे. पोलिसांनी सुरेशचा मृतदेह ताब्यात घेतला असून जवळच्या रुग्णालयात शवविच्छेदनासाठी पाठवण्यात आला आहे.

दरम्यान ही हत्या कोणी केली व का केली हे अद्यापही अस्पष्ट आहे. पोलीस या घटनेचा अधिक तपास करत आहेत. तसेच लवकरात लवकर या घटनेचा छडा लावून गुन्हेगाराला बेड्या ठोकण्यात येतील असे पोलीस अधिकाऱ्याने सांगितले. या घटनेमुळे परिसरात भीतीचे आणि तणावाचे वातावरण निर्माण झाले आहे.