सोलापूर : सोलापूरमध्ये नामवंत न्यूरोसर्जन डॉ. शिरीष वळसंगकर यांच्या आत्महत्या प्रकरणामुळे खळबळ उडाली असून काल अजून एक घटना घडली. विजयपूर ते रायचूर पॅसेंजर एक्सप्रेसमधील एका चिमुकलीला बाहेरील अनोळखी माणसाने दगड मारल्याने त्यात या चिमुरडीचा मृत्यू झाला. या दोन्ही घटनांना पाच दिवस उलटत नाही तोवर जिल्ह्यातून तिसरी घटना समोर आली आहे. एका नऊ महिन्यांच्या गर्भवती महिलेनं चिठ्ठी लिहून आपल्या आयुष्याची अखेर केली आहे. या घटनेनं सोलापूर जिल्हा हादरला आहे.

नऊ महिन्यांच्या गरोदर आईने फेट्याच्या साहाय्याने घरातील लोखंडी पत्र्याच्या अँगलला गळफास घेत आपली जीवनयात्रा संपवली आहे. ही घटना काल सोमवारी दुपारी ३ वाजेच्या सुमारास सांगोला तालुक्यातील गायगव्हाण येथील टकले वस्ती येथे घडल्याची माहिती मिळाली आहे. रुक्मिणी सुरज टकले असं मृत गरोदर मातेचं नाव असल्याची माहिती आहे. मृत महिलेचा पती सुरज सीताराम टकले यांनी पोलीस स्टेशनमध्ये माहिती दिली असून पोलिसांनी अकस्मात मृत्यूची नोंद केली आहे. नऊ महिन्यांच्या गरोदर महिलेने आपल्या राहत्या घरात गळफास घेऊन आयुष्याचा शेवट केल्याने सर्वत्र हळहळ व्यक्त केली जात आहे.

रुक्मिणी आणि सुरज या दोघांचा विवाह गेल्या वर्षी झाला होता. विवाहानंतर रुक्मिणी गर्भवती राहिली आणि या महिन्यात तिची प्रसुती होणार होती. डॉक्टरांनी येत्या २९ एप्रिल रोजी प्रसुतीची तारीख दिली होती. गळफास घेण्यापूर्वी रुक्मिणी टकलेने 'मला माफ करा, माझ्यात कोणताच चांगला गुण नाही', अशी चिठ्ठी लिहून ठेवली होती. काल सोमवारी एप्रिल रोजी दुपारी ३ वाजेच्या सुमारास राहत्या घरातील पत्र्याच्या लोखंडी अँगलला लाल रंगाच्या फेट्याने तिने गळफास घेतला.

काल दुपारी कुटुंबीय रुक्मिणीला जेवणासाठी बोलवत होते. कुटुंबीयांनी बेडरुमचा दरवाजा ठोठावला, पण आतून काहीच प्रतिसाद मिळाला नाही. त्यामुळे दीर स्वप्नील टकले यांनी खिडकीची काच फोडून आत पाहिले असता वहिनी रुक्मिणीने गळफास घेतल्याचं दिसलं. ९ महिन्यांच्या गर्भवती महिलेनं अशाप्रकारे आयुष्याचा शेवट केल्याने परिसरात हळहळ व्यक्त केली जात आहे. सांगोला ग्रामीण रुग्णालयात रात्री उशिरा मृत रुक्मिणीचे शवविच्छेदन केल्यानंतर मृतदेह नातेवाईकांना देण्यात आला.