भरत मोहोळकर, साम टीव्ही

सिंधुदुर्ग : सरपंच संतोष देशमुखांच्या क्रुर हत्येनं महाराष्ट्र हादरला. ही घटना ताजी असतानाच सिंधुदुर्गच्या कुडाळमधून आणखी एक संतापजनक प्रकार समोर आलाय. सिद्धेश शिरसाट आणि त्याच्या साथीदारांनी सिद्धीविनायक बिडवलकरचं अपहरण करुन अत्यंत अमानुषपणे हत्या केली. त्यामुळेच सिंधुदुर्गची अवस्था बीडपेक्षा भीषण असल्याचा आरोप ठाकरे गटाच्या वैभव नाईकांनी केलाय.

प्रकाश बिडवलकर हत्येचा घटनाक्रम

मार्च 2023

सिद्धिविनायक उर्फ प्रकाश बिडवलकरचं अपहरण

9 एप्रिल 2025

जीवे मारण्याच्या उद्देशानं अपहरण झाल्याची नातेवाईकांची तक्रार

10 एप्रिल 2025

पोलिसांकडून 4 आरोपींना अटक

आरोपी सिद्धेश शिरसाटसह ३ जणांच्या पोलिसांनी मुसक्या आवळल्या. त्यानंतर पोलीसी खाक्या दाखवताच सिद्धेश शिरसाट पोपटासारखा बोलायला लागला. यावेळी राक्षसी प्रवृत्तीच्या शिरसाटने बिडवलकरच्या हत्येची कबुलीच दिलीय.

पैशांच्या वादातून बिडवलकरचं अपहरण

बिडवलकरला सिद्धेश शिरसाटच्या घरी नेण्यात आलं

शिरसाटने बिडवलकरला नग्न करत मारहाणीचा व्हिडीओ बनवला

मारहाणीदरम्यान बिडवलकरचा मृत्यू

मृत्यूनंतर बिडवलकरची मृतदेह सातार्डा जंगलात जाळला

राख पोत्यात भरुन नष्ट केली आणि हाडं नदीत फेकली

मृत्यूचा थरकाप उडवणाऱ्या हत्येनंतर संतापलेल्या संजय राऊतांनी सिंधुदुर्गच्या कायदा सुव्यवस्थेवर बोट ठेवलंय. तर निलेश राणेंनी वैभव नाईकांच्याच चौकशीची मागणी केलीय. हे असं असलं तरी इतक्या अमानुषपणे हत्या करण्याचं धाडस येतं कुठून? अशा हैवानी वृत्तीच्या आरोपींना २ वर्षापर्यंत अभय कुणी दिलं? या सिंधुदुर्गमधील आरोपींचा आका नेमका कोण आहे? याचा शोध घेऊन आरोपींपाठोपाठ त्यांना पाठीशी घालणारं पोलीस प्रशासन आणि त्यांचा आकाच्याही मुसक्या आवळण्याची गरज आहे.