नोएडामध्ये धक्कदायक घटना घडली आहे. नोएडाच्या सेक्टर १२६ पोलीस स्टेशन परिसरातील शाहपूर गावात भाड्याच्या घरात राहणाऱ्या एका तरुणीला दुसऱ्या भाडेकरूने तिच्या बाथरूममध्ये छुपा कॅमेरा बसवल्याचे आढळून आल्याची घटना समोर आली आहे. छुपा कॅमेरा सापडल्यानंतर महिलेने पोलिसांना याची तक्रार केली. दरम्यान गुन्हा दाखल झाल्यापासून आरोपी फरार आहे.

मिळालेल्या माहितीनुसार, तक्रारदार महिला एका खाजगी कंपनीत काम करते आणि शाहपूर गावात भाड्याच्या खोलीत राहते. तिचे लवकरच लग्न होणार आहे. सोमवारी ती आंघोळ करण्यासाठी बाथरूममध्ये गेली तेव्हा तिला बाथरूमच्या खिडकीजवळ एक छुपा कॅमेरा दिसला. यामुळे ती घाबरली. तिने कॅमेरा काढून स्वतःच्या खोलीत ठेवला. संध्याकाळी कामावरून घरी आल्यावर तिने छुपा कॅमेरा तपासला तेव्हा तिला शेजारच्या भाडेकरू रामानंदचे फोटो आणि व्हिडिओ एसडी कार्ड चिपवर आढळले.

आरोपी रामानंद हा उत्तर प्रदेशातील संत कबीर नगरचा रहिवासी आहे आणि तो इलेक्ट्रिशियन म्हणून काम करतो. महिलेला मिळालेल्या एसडी कार्डवर रामानंद महिलेच्या बाथरूमच्या बाहेर कॅमेरा बसवतानाचे व्हिडिओ आणि फोटो देखील सापडले. या घटनेने महिलेच्या पायाखालची जमीन हादरली. तिने तातडीने पोलीस ठाणे गाठले.

आरोपी रामानंद हा महिलेच्याच इमारतीत राहतो. महिलेचा आरोप आहे की रामानंदने तिचे व्हिडिओ काढण्यासाठी तिच्या खाजगी बाथरूममध्ये छुपा कॅमेरा बसवला होता. महिलेने याबद्दल त्याला विचारपूस केली तेव्हा त्याने ते कबूल केले. महिलेच्या तक्रारीवरून पोलिसांनी आरोपीविरुद्ध गुन्हा दाखल केला आहे.पोलिसांनी या घटनेचा तपास सुरु केला असून आरोपी रामानंद फरार आहे.