काही दिवसांपूर्वी पुण्यात नागरिकांचं रक्षण करणाऱ्या पोलिसावरच धारदार शस्त्राने हल्ला करण्यात आला. ही घटना ताजी असतानाच हिंगोलीमध्ये वाद मिटवण्यासाठी गेलेल्या वरिष्ठ पोलीस कर्मचाऱ्याला मारहाण केल्याची घटना घडली आहे. मारहाण झालेल्या पोलीस कर्मचाऱ्याचे नाव भगीरथ सवंडकर आहे. तर आरोपीचे नाव रवींद्र कुमार समुद्रेवार असे आहे. या घटनेनंतर पोलीसचं सुरक्षित नसतील तर सामान्य नागरिकांचं काय ? असा सवाल उपस्थित केला जात आहे.

पोलिसांनी दिलेल्या माहितीनुसार, सवंडकर हे शेतीचा वाद मिटवण्यासाठी हिंगोलीच्या वसमत तालुक्यातील कुरुंदा पोलीस स्टेशनच्या हद्दीत असलेल्या कुरुंदा टी पॉइंट वर गेले होते. यादरम्यान हा वाद इतका टोकाला गेला की तिथे उपस्थित रवींद्रने कुमारने पोलिसांना मारहाण केली.

सदर घटना ही ४ ऑक्टोबर रोजी म्हणजेच शनिवारी घडली आहे. या घटनेचा व्हिडिओ कॅमेऱ्यामध्ये कैद झाला आहे. आरोपी रवींद्रने पोलीस कर्मचारी सवंडकरांच्या कानशिलात लगावली. त्यानंतर त्यांच्यावर दगडाने हल्ला करण्यात आला.

सार्वजनिक ठिकाणी पोलिसांना मारहाण केल्याप्रकरणी रविंद्रवर गुन्हा दाखल करण्यात आला होता. मात्र या प्रकरणात कुरुंदा पोलिसांनी आरोपी विरोधात कठोर कार्यवाही न करता आरोपीला जामिनावर सोडून देण्यात आले. या घटनेनंतर नागरिकांमध्ये संतप्त प्रतिक्रिया उमटत आहेत. तसेच हिंगोली जिल्हा पोलीस दलातील पोलीस कर्मचारी असुरक्षित आहेत की काय? असा प्रश्न उपस्थित झाला आहे.