अविनाश शेंबटवाड हे चंद्रपूर जिल्ह्यात तहसीलदार पदावर कार्यरत आहेत. दीड वर्षापूर्वी त्याचे लग्न नांदेडमधील एका तरुणीसोबत झाले होते. लग्नानंतर पती-पत्नीमध्ये कौटुंबिक वाद सुरु झाले. अनेकदा त्यांच्यातील वाद विकोपाला देखील गेले आहेत. पत्नीसह अनेकांनी अविनाश शेंबरवाड यांना समजून सांगण्याचा प्रयत्न केला गेला. पण त्यांनी काही ऐकले नाही. ते नेहमी पत्नीला मारहाण करत होते.

वारंवार दारुच्या पार्ट्या, समजून सांगितल्यावर मारहाण करणे, माहेरून पैसे आणण्यासाठी मानसिक छळ, अनैसर्गिक कृत्य करण्यासाठी बळजबरी करणे असे अनेक आरोप तहसीलदाराच्या पत्नीने केले आहे. मुलबाळ होत नाही म्हणून मानसिक त्रास देऊन जादू‌टोणा केल्याचाही आरोप तहसीलदारावर करण्यात आला आहे. 'मी दंडाधिकारी असल्याने माझ्याविरुद्ध कुठेही तक्रार दे काहीच होत नाही.', असे नेहमी म्हणत तहसीलदार वारंवार पत्नीला मारहाण करत होते. तहसीलदाराने दोन वेळा पत्नीवर बंदूक रोखून जीवे मारहाण्याची धमकी दिली.

पत्नीने दिलेल्या तक्रारीवरुन तहसीलदार अविनाश शेंबटवाड यासह दोन डॉक्टर्स, सासू-सारे आणि इतर काही जणांविरोधात नांदेडच्या शिवाजीनगर पोलिस ठाण्यात विविध कलमांतर्गत नरबळी, अमानुष अघोरी जादूटोणा प्रतिबंध तसेच पिस्तुल रोखल्या प्रकरणी शस्त्र अधिनियम नुसार गुन्हा दाखल करण्यात आला आहे. पुढील तपास पोलिसांकडून सुरू आहे. तहसीलदाराला अटक करण्यात आल्यामुळे नांदेडमध्ये खळबळ उडाली आहे.

दरम्यान, पत्नीची तक्रार दाखल केल्यानंतर पोलिसांकडून तहसीलदार यांचा शोध सुरू होता. शनिवारी तहसीलदार नांदेडला आल्याची माहिती मिळताच पोलिसांनी तहसीलदार राहत असलेल्या नांदेडमधील घरी धाव घेतली. त्यानंतर पोलिसांनी तहसीलदाराला अटक केली. हे प्रकरण सुरुवातीला पोलिस दलातील महिला कक्षाकडे गेले होते. दोघांत समेट करण्यासाठी बरेच प्रयत्न करण्यात आले. यासाठी दोन तीन नोटीसाही पाठविण्यात आल्या. परंतु नोटीसाला दाद दिली नसल्याची माहिती देखील समोर आली आहे.