Ulhasnagar :

उल्हासनगर शहरातील एका मटका किंगच्या मुलावर जीवघेणा हल्ला करणाऱ्या गुंडाला तब्बल दोन वर्षांनी पोलिसांनी गुजरात मधून अटक केली आहे. उल्हासनगर न्यायालयाने त्याला ५ दिवसांची पोलिस कोठडी सुनावली आहे. (Maharashtra News)

सन २०२० मध्ये हितेंद्र ठाकूरने श्रीराम चौकातील डान्सबार समोर संदीप गायकवाड यांच्यावर गोळीबार केला होता. या प्रकरणी विठ्ठलवाडी पोलिसांनी हितेंद्र ठाकूर अटक केली होती. जेलमधून बाहेर आल्यावर गुंड हितेंद्र ठाकूर याने संदीप गायकवाड याचा मुलगा प्रथम याच्यावर ९ डिसेंबर २०२२ साली सी. ब्लॉक येथे जीवघेणा हल्ला केला होता. त्यानंतर हितेंद्र ठाकूर पळून गेला होता.

ठाकूर हा गुजरात वापी येथील कांचननगर येथे असल्याचे निष्पन्न झाल्यावर मध्यवर्ती पोलिस ठाण्याचे वरिष्ठ पोलिस निरीक्षक शंकर आवताडे यांच्या मार्गदर्शनाखाली मध्यवर्ती पोलिस ठाण्याच्या गुन्हे विभागाच्या पथकाने वापी मध्ये सापळा रचून हितेंद्र ठाकूर याला अटक केली.

उल्हासनगर न्यायालयाने त्याला ५ दिवसांची पोलिस कोठडी सुनावी आहे. हितेंद्र हा सराईत गुन्हेगार असून त्याच्यावर नारपोली पोलीस स्टेशनमध्ये घरफोडी व चोरीचे एकुण ५ गुन्हे व पडघा पोलिस स्टेशन मध्ये घरफोडीचे २ गुन्हे दाखल असल्याची माहिती शंकर आवताडे (वरिष्ठ पोलिस निरीक्षक) यांनी दिली.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar