Summary -

• पिंपरी-चिंचवडमध्ये संभाजी ब्रिगेड पदाधिकाऱ्याची हत्या

• नकुल भोईर यांची पत्नीनेच केली हत्या

• अनैतिक संबंधाच्या संशयावरून घडली घटना

• मध्यरात्री कपड्याने गळा आवळून केली हत्या

• पोलिसांनी आरोपी महिलेला केली अटक

पिंपरी-चिंचवडमध्ये हत्याकांडाची भयंकर घटना समोर आली आहे. संभाजी ब्रिगेडचा पदाधिकारी आणि सामाजिक कार्यकर्ता म्हणून प्रसिद्ध असलेल्या नकुल भोईर यांची हत्या करण्यात आली. पिंपरी-चिंचवड शहरात ही घटना घडली. चारित्र्याच्या संशयावरून बायकोनेच त्यांची हत्या करण्यात आल्याची प्राथमिक माहिती समोर आली आहे. घटनेची माहिती मिळताच चिंचवड पोलिसांनी घटनास्थळी धाव घेत तपास सुरू केला आहे. या घटनेमुळे पिंपरी-चिंचवडमध्ये खळबळ उडाली.

मिळालेल्या माहितीनुसार, संभाजी ब्रिगेडचे पदाधिकारी नकुल आनंद भोईर (४० वर्षे) यांची हत्या करण्यात आली. मध्यरात्री अडीच ते पावणे तीनच्या सुमारास ही घटना घडली. नकुल भोईर आपल्या पत्नीसोबत चिंचवड पोलिस स्टेशन हद्दीत माणिक कॉलनी या ठिकाणी राहत होते. त्यांची पत्नी चैताली भोईरने (२८ वर्षे) अनैतिक संबंधाच्या संशयावरून हत्या केली. पोलिसांनी चैतालीला अटक केली.

पोलिसांनी दिलेल्या माहितीनुसार, नकुल हे बायको चैतालीच्या चारित्र्यावर संशय घेत होते. त्यामुळे नकुल आणि चैताली यांच्यामध्ये चारित्र्याच्या संशयावरून नेहमी वाद व्हायचे. तोच राग मनात धरून चैतालीने नकुल यांची हत्या केली. मध्यरात्री अडीचच्या सुमारास चैतालीने कपड्याच्या सहाय्याने नकुल यांचा गळा आवळत त्यांची हत्या केली. या घटनेनंतर पिंपरी चिंचवड पोलिसांनी घटनास्थळी धाव घेत नकुल यांचा मृतदेह ताब्यात घेतला आणि शवविच्छेदनासाठी रुग्णालयात पाठवला. पोलिसांनी चैतालीविरोधात गुन्हा दाखल करत तिला अटक केली. पोलिस सध्या तपास करत आहेत.