पनवेल तालुक्यामधील जावळे गावामध्ये एका खोलीत राहणाऱ्या कुटुंबाने सामूहिक आत्महत्येचा प्रयत्न केल्याची घटना घडलीय. या घटनेमुळे परिसरात खळबळ माजली आहे. आत्महत्या करण्याचा प्रयत्न करणाऱ्या पाचजणांपैकी एकाचा मृत्यू झालाय. इतरांवर नवी मुंबईतील एमजीएम रुग्णालयात उपचार सुरू आहेत. याबाबत उलवा पोलीस ठाण्याचे पोलीस अधिक तपास करीत आहेत. 

जावळे गावात भाड्याच्या घरात राहणाऱ्या एकाच कुटुंबातील पाच जण बेशुद्ध अवस्थेत सापडले. या पाचही जणांनी चहामधून विषारी द्रव्य पिऊन आत्महत्या करण्याचा प्रयत्न केलाय. या घटनेतील एका पुरुषाचा मृत्यू झाला आहे, पोलिसांच्या प्राथमिक तपासात समोर आले आहे.

मूळचे नेपाळी असणारे हे एकाच कुटूंबातील सदस्य जावळे गावात अनेक दिवसांपासून राहत होते. गेल्या दोन ते तीन दिवसापासून त्यांच्या घराचा दरवाजा उघडला नसल्याने त्यांच्या शेजारच्यांनी अग्निशमन दल आणि पोलिसांना याबाबतची माहिती दिली. अखेर सूरक्षा यंत्रणेच्या जवानांनी घराचा दरवाजा उघडल्यानंतर यामध्ये बेशुद्ध अवस्थेत पाचही जण आढळले.

उपचारासाठी या सर्वांना पनवेल येथील नानासाहेब धर्माधिकारी उपजिल्हा रुग्णालयात दाखल केल्यानंतर यामधील २२ वर्षीय संतोष बिरा लूहार याचा मृत्यू झाल्याचे डॉक्टरांनी सांगीतले. तसेच बेशुद्ध व्यक्तींमध्ये २३ वर्षीय रमेश बिरा लोहार, त्यांची पत्नी बसंती व पाच वर्षांचा मुलगा आयुष आणि दोन वर्षांचा आर्यन हे सुद्धा बेशुद्ध असल्याने त्यांच्यावर रुग्णालयात उपचार सुरू झाले. अतिदक्षता विभागाची गरज असल्याने या चौघांना पुढील उपचारासाठी नवी मुंबई येथील रुग्णालयात हलविण्यात आले आहे. यातील दोन लहान मुलांची प्रकृती स्थिर असून आत्महत्येचे नेमके कारण अद्याप समजले नसल्याची पोलिसांनी दिली.