Crime News: ठाणे पोलीस आयुक्तालयाच्या हद्दीतील मुंब्रा येथे शनिवारी (७ मार्च) पहाटे फायरिंगची धक्कादायक घटना घडली आहे. या घटनेत दोन जण जखमी झाले असून पोलिसांनी तातडीने कारवाई करत अवघ्या एका तासात दोन आरोपींना अटक केली आहे. या प्रकरणाचा पुढील तपास मुंब्रा पोलीस आणि गुन्हे शाखेकडून समांतरपणे सुरू आहे.

पोलिसांकडून मिळालेल्या माहितीनुसार, आज पहाटे सुमारे ४.५४ वाजण्याच्या सुमारास अरमान को-ऑपरेटिव्ह हौसिंग सोसायटी, अल्मास कॉलनी, कौसा परिसरात गोळीबार झाल्याची माहिती पोलिसांना मिळाली. ही घटना नदीम मोइनुद्दीन खान उर्फ बाबा खान (वय ४५) यांच्या घराबाहेर घडली. अज्ञात व्यक्तीने त्यांच्या MH 03 CN 5900 क्रमांकाच्या कारवर दोन गोळ्या झाडल्या, तर एक गोळी हवेत फायर केल्याचे समोर आले आहे.

घटनेची माहिती मिळताच मुंब्रा पोलीस घटनास्थळी दाखल झाले आणि परिसरात शोधमोहीम सुरू केली. दरम्यान आरोपी परिसरातील आचार गल्ली येथील भंगार गोदामाजवळ लपल्याची माहिती पोलिसांना मिळाली. पोलीस पथक तेथे पोहोचताच आरोपीने दोन पिस्टलमधून पोलिसांच्या दिशेने गोळीबार सुरू केला. त्यानंतर तो पळत सुटला आणि पळताना पुन्हा त्याने फायरिंग केली.

पोलिसांनी तत्काळ आरोपीचा पाठलाग केला. आरोपीला पकडण्याचा प्रयत्न सुरू असताना त्याने मागे वळून केलेल्या गोळीबारात दोन जण जखमी झाले. जखमींना तातडीने छत्रपती शिवाजी महाराज रुग्णालय कळवा येथे उपचारासाठी दाखल करण्यात आले. दरम्यान पोलिसांना पाठलाग करत मुख्य आरोपीला अखेर पकडण्यात यश मिळवले. आरोपीच्या ताब्यातून दोन पिस्टल, चार काडतुसे आणि चार मॅगझिन जप्त करण्यात आले आहेत.

अटक करण्यात आलेल्या आरोपीचे नाव शहाबाद उर्फ शब्बू मुन्ना शमशाद कुरेशी (वय २८) असे असून तो मुंब्रा येथील रहिवासी आहे. त्याच्यावर जाफराबाद परिसरातील चार पोलीस ठाण्यांमध्ये विविध गुन्हे दाखल आहेत. तसेच तो यापूर्वी तिहार तुरुंगात आठ वर्षांची शिक्षा भोगून आला आहे. या घटनेतील आणखी एका संशयित साथीदारालाही पोलिसांनी अटक केली असून पुढील तपास सुरू असल्याची माहिती वरिष्ठ पोलीस निरीक्षक अनिल शिंदे यांनी दिली.