संजय गडदे, साम टीव्ही

Mumbai Crime : मुंबईच्या कुरार पोलीस ठाण्याच्या हद्दीतून चोरीस गेलेल्या ऑटोरिक्षांच्या मालिकेचा अखेर पर्दाफाश झाला आहे. या प्रकरणात पोलिसांनी कौशल्यपूर्ण तपास करून दोघा चोरट्यांना अटक केली आहे. पोलिसांनी एकूण ७ चोरीच्या ऑटोरिक्षा हस्तगत केल्या आहेत. आरोपींनी अशा प्रकारचे अनेक गुन्हे केल्याची माहिती समोर आली आहे .मोहम्मद मुस्लीम ताहीर अन्सारी (४०) व निसार इदु अहमद (५३) अशी अटक करण्यात आलेल्या आरोपींची नावे आहेत. ते सध्या दोघेही कुरार पोलिसांच्या ताब्यात असून पोलीस अधिकचा तपास करत आहे.

अशोक यादव (वय ४५) यांनी दि. १४ जून रोजी रात्री ११.१५ वाजता त्यांची रिक्षा रस्त्यावर पार्क केली होती. मात्र, दुसऱ्या दिवशी ती चोरीस गेली. फिर्यादीच्या तक्रारीवरून कलम ३०३(२) भा.दं.वि. नुसार गुन्हा दाखल करण्यात आला. पोलिसांनी घटनास्थळावरील तसेच परिसरातील सीसीटीव्ही फुटेजचे बारकाईने निरीक्षण करत तांत्रिक विश्लेषण केले.

तपासात मिळालेल्या गोपनीय माहितीच्या आधारे पोलिसांनी मालाड (पूर्व) येथे सापळा रचून मोहम्मद मुस्लीम ताहीर अन्सारी (४०) व निसार इदु अहमद (५३) या दोन आरोपींना अटक केली.आरोपींकडून एकूण ७ चोरीच्या ऑटोरिक्षा जप्त करण्यात आल्या असून, या आरोपींविरोधात आधीही विविध गुन्हे दाखल असल्याची माहिती पोलिसांनी दिली आहे.

ही कामगिरी पोलीस आयुक्त देवेन भारती, सह पोलीस आयुक्त सत्यनारायण चौधरी, अपर पोलीस आयुक्त शशिकुमार मीना, पोलीस उप आयुक्त महेश चिमटे, सह पोलीस आयुक्त कैलास बर्वे यांच्या मार्गदर्शनाखाली पो.नि. संजीव तावडे व गुन्हे प्रकटीकरण पथकाने उघडकीस आणली. या यशस्वी तपासाबद्दल कुरार पोलिसांचे सर्वत्र कौतुक होत आहे.