उत्तर प्रदेशच्या राजधानी लखनऊमध्ये एक धक्कादायक आणि मन हेलावून टाकणारी घटना घडली आहे. आशियाना पोलीस ठाण्याच्या हद्दीत असलेल्या सेक्टर-एम भागात एका बांधकाम सुरू असलेल्या बिल्डिंगमध्ये १३ वर्षांच्या मुलीवर पाच मजुरांनी सामूहिक बलात्कार केल्याची घटना घडली आहे. या घटनेमुळे परिसरात खळबळ उडाली आहे.

मिळालेल्या माहितीनुसार, पीडित मुलगी जवळ असलेल्या घरात लहान मुलांना सांभाळण्याच काम करत होती. ती नेहमीप्रमाणे कामावर जात होती आणि अचानक पाऊस आला. पावसात भिजू नये म्हणून तिने बाजूलाच सुरु असलेल्या इमारतीत थांबण्याचा निर्णय घेतला. यावेळी तिथे काम करत असलेल्या एका मजुराने तिला आत ओढलं.

यावेळी त्या मजूराचे साथीदार बाहेर पहारा देत होते. मुलीने विरोध केला असता तिचे हात-पाय बांधून तिला मारहाण करण्यात आली. इतकंच नाही तर तिच्या तोंडात कापडाला बोळा कोंबला आणि पाच जणांनी तिच्यावर सामुहिक बलात्कार केला.

आरोपींना पकडण्यात पोलिसांना यश

ज्या घरात मुलगी लहान मुलांना सांभाळण्याचं काम करत होती त्या घरातील महिलेने ती वेळेवर न आल्याने शोधाशोध सुरू केला. यावेळी मुलीचा भाऊही शोध घेत असताना घटनास्थळी पोहोचला. त्याला पाहून आरोपी पळू लागले. दोन आरोपी छतावरून उडी मारून पळून जात असताना जखमी झाले. या घटनदरम्यान इतका आरडाओरडा झाला ते ऐकून स्थानिक लोकही जमा झाले आणि पाचही आरोपींना पकडून पोलिसांच्या हवाली केलं.

पोलिसांची मोठी कारवाई

या घटनेची माहिती मिळताच पोलिसांनी घटनास्थळी धाव घेतली आणि सर्व आरोपींना ताब्यात घेतलं. पीडित मुलीला तातडीने लोकबंधु रुग्णालयात दाखल करण्यात आलं असून तिची वैद्यकीय तपासणी झाली आहे. डीसीपी यांनी या घटनेत बलात्कार झाल्याची माहिती दिली आहे. दरम्यान याबाबत पोलिसांनी गुन्हा दाखल करून पुढील तपास सुरू केला आहे. तर पाचही आरोपींना चौकशीसाठी पोलीस कोठडीत ठेवण्यात आलं आहे.