महाराष्ट्रातील भंडारा जिल्ह्यातून धक्कदायक बातमी समोर आली आहे. एक लेन सोडून चुकीच्या लेनने भरधाव वेगाने येणाऱ्या एका वाळूने भरलेल्या टिप्परने दुचाकीस्वाराला चिरडले. या घटनेत दुचाकीस्वाराचा जागीच मृत्यू झाल्याची माहिती मिळाली आहे. सदर घटना ही लाखनी-भंडारा राष्ट्रीय महामार्ग क्रमांक ५३ वर सिंगोरी गावाजवळ घडली. पोलीस या घटनेचा अधिक तपास करत आहेत. या घटनेतील मृत व्यक्तीचे नाव राजू देवराज भोयर (वय ४५, रा. गुंथारा) असे आहे.

मिळालेल्या माहितीनुसार, लाखनी-भंडारा राष्ट्रीय महामार्ग क्रमांक ५३ वर सिंगोरी गावाजवळ एक भरलेला टिप्पर चुकीच्या लेन वरून साकोलीच्या दिशेने जात होता. यावेळेस राजू भोयर हे त्यांची स्कूटी घेऊन गुंथारा येथून भंडार्‍याच्या दिशेने जात होते. याच दरम्यान भरधाव वेगाने येणाऱ्या टिप्परने राजू यांच्या दुचाकीला धडक दिली. धडकेनंतर टिप्पर रस्त्याच्या कडेला उलटला. गाडी भरधाव वेगात असल्याने राजू भोयर हे गाडी खाली चिरडले गेले.

या घटनेनंतर स्थानिकांनी घटनास्थळी धाव घेत पोलिसांना कळवले. कारधा पोलिसांनी तातडीने घटनास्थळी धाव घेऊन परिस्थिती नियंत्रणात आणली. ठाणेदार गोकुल सूर्यवंशी यांनी आपल्या पथकासह घटनास्थळी पोहोचून क्रेनच्या मदतीने मृतदेह बाहेर काढला. हा अपघात इतका भयंकर होता की राजू यांच्या स्कूटीचा पूर्णपणे चेंदामेंदा झाला.

दोन क्रेन आणि एका जेसीबी मशीनच्या मदतीने टिप्परमधील वाळू रिकामी करून तो हटवण्यात आला. घटना घडल्यानंतर टिप्पर चालक पळून गेला आहे. कारधा पोलीस टिप्पर चालकचा शोध घेत असून या घटनेचा सविस्तर तपास करत आहेत.