इंदूर : इंदूरहून शिलाँगला हनिमूनसाठी फिरायला गेलेलं नवविवाहित कपल राजा रघुवंशी आणि सोनम रघुवंशी केसमध्ये आता नवीन माहिती समोर आली आहे. पोलिसांनी एका नव्या गाईडकडे चौकशी सुरु केली आहे. त्याने दावा केला आहे की, हे कपल एकटं नाही, तर अन्य २ ते ३ लोकांसोबत फिरायला गेलं होतं. त्यामुळे या प्रकरणाला वेगळंच वळण लागण्याची शक्यता आहे. कारण आतापर्यंत कुटुंबियांना वेगळीच माहिती दिली जात होती. दरम्यान, मृत राजाचा भाऊ विपिन रघुवंशीनं यावर प्रश्न उपस्थित केला आहे. जर हा गाईडही त्यांच्यासोबत होता, मग पोलिसांनी त्याला समोर का आणलं नाही?

विपिन रघुवंशीने शिलाँग पोलिसांच्या तपास प्रक्रियेवर प्रश्नचिन्ह उपस्थित केले आहेत. त्यांचं म्हणणं आहे की, 'पोलीस खूप धीम्या गतीने तपास करत आहेत. अनेक महत्त्वाचे पुरावे हातातून जाऊ शकतात. हॉटेलच्या सीसीटीव्ही फुटेजमध्ये तीन संशयीत लोक दिसले आहेत. या लोकांची कसून चौकशी केली जात आहे. पोलिसांनी हॉटेलचं डीवीआर जप्त केलं आहे. पण पोलिसांच्या धीम्या तपासामुळे पुरावे नष्ट होऊ शकतात'.

राजाच्या कुटुंबियांनी शिलाँग प्रशासनाकडे पोस्ट मार्टेम रिपोर्टची मागणी केली आहे. परंतु, आतापर्यंत रिपोर्ट देण्यात आला नाही. यामुळे या प्रकरणातील महत्त्वाचे पुरावे नष्ट होऊ शकतात, अशी भीती कुटुंबियांना आहे. दरम्यान, पीडित कुटुंबियांनी या प्रकरणाची उच्चस्तरीय चौकशीची मागणी केली आहे. राजाची हत्या कोणी केली? याचा शोध लावण्यासाठी ही मागणी केली जात आहे. सोनम कुठे गायब झाली आहे? पोलिसांकडून अन्य गाईड आणि संशयितांकडे चौकशी केली जात आहे.