उत्तर प्रदेशातील लखनऊ मधून धक्कदायक बातमी समोर आली आहे. एका ७ वीत शिकणाऱ्या विद्यार्थिनीला इंस्टाग्रामवरची मैत्री महागात पडली आहे. या अल्पवयीन मुलीसोबत ओळख करून तिच्याशी मैत्री करून तिच्यावर दोन दिवस बलात्कार केल्याचा संतापजनक प्रकार उघड झाला आहे. आरोपींची नावे विमल यादव, पियुष मिश्रा आणि शुभम शुक्ला अशी आहेत. या घटनेने परिसरात खळबळ उडाली असून मुलींच्या सुरक्षिततेवर प्रश्नाचिन्ह उभे राहिले आहे.

मिळालेल्या माहितीनुसार, पीडित मुलीने दीड महिन्यांपूर्वी इन्स्टाग्रामवर विमल यादव नावाच्या तरुणाशी मैत्री केली. ही मैत्री कालांतराने वाढत गेली. वाढलेल्या मैत्रीनंतर विमलने पीडितेला भेटण्यासाठी बोलावले. त्यानंतर तो तिला मडियांव पोलिस स्टेशन परिसरातील आयआयएम रोडवरील एका हॉटेलमध्ये घेऊन गेला. या हॉटेलमध्ये विमलचे मित्र सुद्धा आधीपासून येऊन थांबले होते.

पीडितेला हॉटेलच्या रूमवर घेऊन गेल्यानंतर विमलने आणि त्याच्या मित्रांनी मुलीवर जबरदस्ती करायला सुरुवात केली. मात्र या नराधमांच्या जाळ्यात फसलेल्या मुलीने त्यांना विरोध केला. मुलीने विरोध केल्याने तिला ओलीस ठेवण्यात आलं. त्यानंतर आळीपाळीने तिच्यावर दोन दिवस बलात्कार करण्यात आला. या दरम्यान त्यांनी व्हिडिओ देखील काढला. शिवाय पीडितेला हा व्हिडिओ व्हायरल करण्याची धमकी दिली.

२ नोव्हेंबर रोजी पीडितेने या नराधमांच्या तावडीतून पळ काढला आणि घर गाठले. घरी गेल्यावर पीडितेने घडलेला प्रकार कुटुंबियांना सांगितला. कुटुंबीयांनी तात्काळ पोलीस ठाण्यात धाव घेत घडलेल्या प्रकरणी तक्रार दाखल केली. पोलिसांनी तीन आरोपींविरुद्ध गुन्हा दाखल केला आहे. या प्रकरणी पोलिसांनी तपास सुरु केला आहे. या घटनेनं परिसरात भीतीचे वातावरण निर्मण झाले आहे.