कोलकतामध्ये एक धक्कादायक घटना घडलीय. दोन जणांनी महिलेवर अत्याचार केलाय. वाढदिवसाच्या दिवशी दोघांनी महिलेला गोड बोलून फ्लॅटमध्ये नेलं आणि तिच्यावर अत्याचार केला. कोलकाता येथील रिजंट्स पार्क परिसरात ही घटना घडलीय. याप्रकरणी संशयित फरार आहेत, तर पोलिसांनी गुन्हा दाखल करून तपास सुरू केला आहे.

मिळालेल्या माहितीनुसार, महिलेचं वय २० वर्ष असल्याचं सांगितलं जात आहे. हरिदेवपूर येथे ही पीडित महिला राहते. शुक्रवारी, ५ सप्टेंबर रोजी तिच्या वाढदिवसाच्या रात्री तिच्या ओळखीच्या दोन लोकांनी तिच्यावर सामूहिक बलात्कार केला. चंदन मलिक आणि द्विप (दीप) बिस्वास अशी आरोपींची नावे आहेत. दोन्ही आरोपी सध्या फरार असून पोलिसांकडून त्यांचा शोध घेतला जात आहे.

पोलीस सूत्रांनी दिलेल्या माहितीनुसार,पीडित महिला काही महिन्यांपूर्वी चंदन मलिकला भेटली होती. त्याने आपण दक्षिण कोलकात्यातील पूजा समितीचा प्रमुख असल्याचं पीडिताला सांगितलं होतं. काही दिवसांनी मलिकने महिलेची ओळख द्विपशी करून दिली. त्या दोघांनीही तिला समितीमध्ये सहभागी करून घेण्याचे आश्वासन दिलं होतं. त्याच भूलथापांना ही महिला बळी पडली.

घटनेच्या रात्री, आरोपींनी पीडितेला रिजेंट पार्क परिसरातील एका फ्लॅटमध्ये नेले. तेथे त्यांनी एकत्र जेवण केलं. जेव्हा पीडिता निघून जाण्याचा प्रयत्न करत होती, तेव्हा त्या दोघांनी तिला मारहाण केली. रुमचा दरवाजा बंद केला. त्यानंतर तिच्यावर बलात्कार केला. दुसऱ्या दिवशी सकाळी पीडिता तेथून पळून जाण्यात यशस्वी झाली आणि घरी परतली, असं पीडित महिलेनं सांगितलंय.

पीडितेने हरिदेवपूर पोलीस ठाण्यात याप्रकरणी तक्रार दाखल केली आहे. पोलिसांनी दिलेल्या अधिकृत निवेदनात म्हटले आहे की, "एफआयआरमध्ये नाव नोंदवलेला आरोपी चंदन मलिक याने पीडितेला मालांचाजवळील दुसऱ्या आरोपी द्विप बिस्वासच्या घरी नेले. तेथे दोघांनीही मारहाण करत तिच्यावर बलात्कार केला. दरम्यान या प्रकरणाचा तपास पोलिसांकडून केला जात आहे."