अभिजित देशमुख

Kalyan Crime News

ढाब्यावर गाणी लावण्यावरून तरुण तरुणींमध्ये झालेल्या वादानंतर विनयभंग आणि मारहाणीसारखा धक्कादायक प्रकार डोंबिवलीमध्ये घडला आहे. याप्रकरणी डोंबिवली पोलीस ठाण्यात चार तरुणांविरोधात पीडितेने तक्रार दाखल केली आहे. दरम्यान पोलिसांनी गुन्हा दाखल केला असून त्या तरुणांचा शोध सुरू केला आहे.

पोलिसांनी दिलेल्या माहितीनुसार, पीडित तरुणी काल आपल्या दोन मैत्रिणींसोबत डोंबिवली पूर्वेकडील 90 फिट रोडवरील एका ढाब्यावर जेवणासाठी गेली होती . जेवत असताना सुमित व त्याच्या मित्रांनी ब्लूटूथ वरून मराठी गाणी लावली होती. त्यावेळी पीडिता व तिच्या मैत्रिणीने सुमितला हिंदी गाणी लावण्याची विनंती केली. यावरून पीडिता तिच्या मैत्रिणी आणि सुमित व त्याच्या मित्रांमध्ये वाद सुरू झाला.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

हा वाद सुरू असताना सुमितच्या मित्रांनी या पीडित तरुणींचा व्हिडिओ काढला. पीडीतेने हा व्हिडिओ डिलीट करण्याची विनंती केली. मात्र संतापलेल्या सुमितने व्हिडिओ डिलीट तर केलाच नाही उलट त्या पीडितेचा विनयभंगा केला. इतकेच नाही तर तिथे असलेले सुमित चे मित्र राहुल ,दानिश आणि सुमित यांनी पीडितेच्या मैत्रिणींना मारहाण करायला सुरुवात केली. दरम्यान या प्रकारानंतर पीडित तरुणीने थेट डोंबिवली पोलीस स्थानक गाठले आणि तक्राग दाखल केली. तक्रारीनुसार पोलिसांनी सुमित गायकवाड व त्याच्या तीन मित्रांविरोधात गुन्हा दाखल करत त्यांचा शोध सुरू केलाय .