संघर्ष गांगुर्डे, कल्याण प्रतिनिधी

प्रेमाच्या जाळ्यात ओढून लग्नाचे आमिष दाखवले, बौद्ध पद्धतीने लग्न केल्याचे नाटक केले आणि त्यानंतर वारंवार लैंगिक अत्याचार केल्याचा धक्कादायक प्रकार कल्याणमध्ये समोर आला आहे. विशेष म्हणजे दुसऱ्या तरुणीशी लग्न केल्यानंतरही पीडित तरुणीचा छळ आणि तिला धमक्या देण्याचे प्रकार सुरूच असल्याचा आरोप करण्यात आला आहे. या प्रकरणी कल्याणच्या महात्मा फुले पोलिसांनी मुख्य आरोपी सुजल गायकवाड याला अटक केली असून, त्याच्यासह कुटुंबातील एकूण पाच जणांविरोधात गुन्हा दाखल करण्यात आला आहे.

मिळालेल्या माहितीनुसार, मुख्य आरोपी सुजल गायकवाड याने पीडित तरुणीशी प्रेमसंबंध निर्माण करून तिला लग्नाचे आमिष दाखवले. त्यानंतर त्यांनी लग्न केल्याचे भासवून तिच्यावर वारंवार लैंगिक अत्याचार केला असा आरोप पिडितेकडून करण्यात आला आहे.

दरम्यान, आरोपीने दुसऱ्या तरुणीशी लग्न केल्यानंतरही पीडितेचा मानसिक छळ सुरूच ठेवला. तसेच तिला वारंवार धमक्या दिल्याचाही आरोप तक्रारीत करण्यात आला आहे. या प्रकाराला कंटाळून अखेर पीडित तरुणीने पोलिसांकडे धाव घेतली.

पीडितेच्या तक्रारीवरून महात्मा फुले पोलिसांनी मुख्य आरोपी सुजल गायकवाडसह त्याच्या कुटुंबातील एकूण पाच जणांविरोधात गुन्हा दाखल केला आहे. पोलिसांनी सुजल गायकवाड याला अटक करून न्यायालयात हजर केले असता न्यायालयाने त्याला न्यायालयीन कोठडी सुनावली.

मात्र, या प्रकरणातील इतर नातेवाईकांना अभय दिले जात असल्याचा गंभीर आरोप पीडित तरुणीने केला आहे. त्यामुळे संबंधितांवरही कारवाई करण्यात यावी, अशी मागणी पीडितेकडून होत आहे.

या संपूर्ण प्रकरणाचा पुढील तपास कल्याणचे महात्मा फुले पोलीस करत आहेत. दरम्यान, पीडितेने केलेल्या आरोपांची सत्यता पोलीस तपासातून स्पष्ट होणार आहे.