मंगळवेढा तालुक्यातील सिध्दनकेरी येथील मठाच्या वादातून एका धर्मोपदेशकाला लोखंडी गजाने मारहाण करण्यात आल्याची धक्कादायक घटना समोर आली आहे. या मारहाणीमध्ये ६४ वर्षाचे राचोटेश्वर शिवाचार्य स्वामी गंभीर जखमी झाले आहेत. या प्रकरणी मंगळवेढा पोलिस ठाण्यात मारहाण करणार्या सहा जणांविरोधात गुन्हा दाखल करण्यात आला आहे.

'मीच या मठाचा पुजारी आणि मालक, तुझा येथे काही संबंध नाही,' असे म्हणत गावातील काही गुंडांनी धर्मोपदेशकाला लोखंडी रॉड आणि लाथाबुक्क्यांनी मारहाण केली. या घटनेत मठाच्या आतच हल्ला करण्यात आला. पोलिसांनी या प्रकरणी सहा जणांविरोधात गुन्हा दाखल केला आहे आणि पुढील तपास सुरू आहे. मारहाणी नंतरचा व्हिडिओ समाजमाध्यमात व्हायरल झाला आहे.

पोलिसांनी दिलेल्या माहितीनुसार, सिद्धनकेरी येथील मठात राहणारे ६४ वर्षीय राचोटेश्वर शिवाचार्य स्वामीजी यांच्यावर मारहाण करण्यात आली. या प्रकरणी राजू लिंगाप्पा कोरे, मंजूनाथ सकलेश कोरे, भिमू सिध्दाप्पा कोरे, प्रमोद रेवाप्पा कोरे, संतोष रामचंद्र कोरे आणि सिध्दू येसाप्पा कोरे यांच्याविरुद्ध मंगळवेढा पोलीस ठाण्यात गुन्हा दाखल करण्यात आला आहे. पोलिसांनी तपास सुरू केला आहे.

फिर्यादी राचोटेश्वर स्वामीजी सिध्दनकेरी येथील तोफकट्टी संस्थान मठात गेली 36 वर्षे मठपती म्हणून कार्यरत आहेत. तेथे सिद्धेश्वर मंदिर देखील आहे. स्वामीजींच्या सोबत शिष्य काशिबाई रेवणसिद्धा आणि शिवमुर्ती राचप्पा स्वामी नेहमी असतात. मठात पुजापाठासाठी आलेल्या काही स्थानिकांनी 'हा मठ आमचा आहे' असे सांगून स्वामीजी यांच्याशी वाद घातला. यामुळे तणाव निर्माण झाला आणि घटना घडली.

नेमकं काय घडलं?

३ मार्च रोजी रात्री ९.00 वाजता, सिध्दनकेरी येथील तोफकट्टी मठात राचोटेश्वर स्वामीजी झोपण्यासाठी जात असताना, आरोपींनी मठातील सीसीटीव्ही तोडले. त्यानंतर त्यांनी स्वामीजींना खोलीतून बाहेर ओढत आणून बेदम मारहाण केली. 'मीच मठाचा पुजारी आणि मालक आहे, तू बाहेरून आलास, तुझा इथे काही संबंध नाही,' असे म्हणत स्वामीजींना मारहाण केली. स्वामीजींनी आरोपींना समजावण्याचा प्रयत्न केला, तरीही त्यांनी मठातील लाईट बंद करून लोखंडी गजाने स्वामीजींना गंभीर जखमी केले. या प्रकरणी राचोटेश्वर स्वामीजींनी पोलिसात तक्रार दाखल केली, त्यानंतर सहा जणांविरोधात गुन्हा दाखल करण्यात आला आहे. पोलिसांकडून तपास सुरू आहे.