पुण्यातील पिंपरीमध्ये पोलिसांनी मोठी कारवाई केल्याची माहिती समोर आली आहे. पिंपरी चिंचवड शहरातील पोलिसांनी रेकॉर्ड वरील चार सराईत बाल गुन्हेगारांच्या ताब्यातून चार देशी पिस्तूल आणि चार जिवंत काडतुसे सापळा रचून जप्त केली आहेत. या घटनेने शहरात भीतीचे वातावरण निर्माण झाले असून पोलीस या घटनेचा सविस्तर तपास करत आहेत.

पिंपरी पोलीस स्टेशन हद्दीतील डेअरी फार्म जवळ चार अल्पवयीन मुलं काही अगदी शस्त्रांसह थांबून कुणाची तरी वाट पाहत आहेत अशी गोपनीय माहिती पिंपरी पोलिसांना मिळाली होती. मिळालेल्या माहितीनुसार पोलिसांनी घटनास्थळी सापळा रचला. पूर्ण प्लॅनिंगनुसार पोलिसांनी रेकॉर्ड वरील चार सराईत बाल गुन्हेगारांच्या ताब्यातून चार देशी पिस्तूल आणि चार जिवंत काडतुसे सापळा रचून जप्त केली आहेत.

पोलिसांनी या गुन्हेगारांना ताब्यात घेतल्यानंतर त्यांची कसून चौकशी करण्यात आली. मध्य प्रदेशातील पप्पी सिंग यांच्याकडून आम्ही पिस्तुल आणि काडतुसे आणली आहेत अशी माहिती तपासा दरम्यान बाल गुन्हेगारांनी पोलिसांना दिली आहे. पोलिसांनी ताब्यात घेतलेल्या चार बाल गुन्हेगारांपैकी दोन बाल गुन्हेगारांवर पुणे आणि पिंपरी चिंचवड शहरातील सिंहगड पोलीस स्टेशन, वारजे पोलीस स्टेशन आंबेगाव पोलीस स्टेशन भारती विद्यापीठ पोलीस स्टेशन आणि चिखली पोलीस स्टेशन मध्ये गंभीर स्वरूपाचे गुन्हे दाखल आहेत अशी माहिती पोलिसांच्या वतीने देण्यात आली आहे.

दरम्यान या घटनेनंतर पिंपरी चिंचवड शहरात भीतीदायक वातावरण निर्माण झाले आहे. तसेच पुण्यातील वाढत्या गुन्हेगारीच्या आकड्यांनंतर बाल गुन्हेगारी चर्चेचा विषय बनला आहे. या बाल गुन्हेगारांना पोलीस कोणती शिक्षा करणार हे पाहणं महत्त्वाचं ठरेल. शिवाय त्यांनी या पिस्तुलाचा वापर कुठे आणि का केला याचा तपास पोलीस करत आहेत.