अभिजित देशमुख

Dombivli Crime News :

विद्यार्थ्यांच्या परीक्षा सुरू असल्याने लाऊडस्पीकरचा आवाज कमी करण्यास सांगणाऱ्याला व्यक्तीला बेदम मारहाण करण्यात आली आहे. डोंबिवली शेलार चौक इंदिरा नगर परिसरात ही घटना घडली आहे. या प्रकरणी डोंबिवली राम नगर पोलीस ठाण्यात मारहाण करणाऱ्याविरोधात गुन्हा दाखल करत पुढील तपास सूरु केला आहे.

मिळालेल्या माहितीनुसार, राज्यभरात 10, 12 वीसह शाळा व महाविद्यालयिन परीक्षा सुरू आहेत. परीक्षेच्या पार्श्वभूमीवर विद्यार्थी दिवसरात्र अभ्यास करत आहेत. डोंबिवली पूर्वेतील शेलार नाका भागातील इंदिरानगरमध्ये श्याम सोनावणे राहतात. त्यांच्या शेजारी राहणारे रामदास अहिरे यांच्या घरी वाढदिवसाचा कार्यक्रम सुरू होता.

या कार्यक्रमात डीजे लावण्यात आला होता. रात्री बारा वाजून गेल्यानंतर ही लाऊडस्पीकरवर मोठ्या आवाजातील गाणी सुरू होती. अखेर श्याम सोनावणे यांनी परिसरातील मुलांच्या परीक्षा सुरू आहेत, असं सांगत लाऊडस्पीकरचा आवाज कमी करण्याची विनंती केली. त्यामुळे अहिरे कुटुंबीयांना राग आला, त्यांनी सोनावने यांच्याशी वाद घालण्यास सुरुवात केली.

याच दरम्यान अहिरे यांच्या वाढदिवसाच्या कार्यक्रमला आलेल्या दोघांनी सोनावणे यांना बेदम मारहाण केली. या मारहाणीत सोनावणे यांना दुखापत झाली असून या प्रकरणी डोंबिवली रामनगर पोलीस ठाण्यात तक्रार नोंदवली केली. या तक्रारी नुसार मारहाण करणाऱ्या विरोधात गुन्हा दाखल केला असून पोलीस पुढील तपास करत आहेत.