Shocking Incident : धनत्रयोदशीच्या दिवशी जत्रेमध्ये फिरणाऱ्या एका किशोरवयीन मुलीला सार्वजनिकरित्या छेडछाड करण्यात आली. छेडछाड होत असल्याचा व्हिडीओ सोशल मीडियावर व्हायरल झाला. हा व्हिडीओ पोलिसांपर्यंत पोहोचला, व्हिडीओची दखल घेत पोलिसांनी संबंधित आरोपीला अटक केली. ही घटना उत्तरप्रदेशातील हरदोई येथे घडल्याचे म्हटले जात आहे.

मिळालेल्या माहितीनुसार, हरदोईतील कोतवाली शहर परिसरात असलेल्या सिनेमा रोडवर ही घटना घडली. धनत्रयोदशी, दिवाळीच्या निमित्ताने संध्याकाळी बाजारपेठा गर्दीने भरलेल्या होत्या, सर्वत्र रोषणाई होती. त्या दरम्यान काशीनाथ गल्लीजवळ एका व्यक्तीने एका किशोरवयीन मुलीशी गैरवर्तन केले. ही घटना एका कॅमेऱ्यामध्ये कैद झाली.

छेडछाडीची घटना रस्त्यावरील एकाने त्याच्या फोनमध्ये रेकॉर्ड केली आणि त्याचा व्हिडीओ सोशल मीडियावर शेअर केला. या व्हिडीओमध्ये आरोपी हा तरुणाच्या मागे चालत असल्याचे दिसते. गर्दीचा फायदा घेत तो तरुणीला स्पर्श करतो आणि तिचे चुंबन घेण्याचा प्रयत्न करतो. व्हिडीओ व्हायरल झाल्यानंतर पोलिसांनी ताबडतोब कारवाई केली.

तपासानंतर फक्त तीन तासांमध्ये पोलिसांनी आरोपीला अटक केली. तो मोहालिया शिवपार, कोतवाली देहात पोलिस स्टेशन, हरदोई येथील रहिवासी असल्याचे उघड झाले. अटकेदरम्यान त्याने पळून जाण्याचा प्रयत्न केला. पण पोलिसांनी त्याला पळू दिले नाही. या झटापटीमध्ये त्याच्या पायाला दुखापत झाली. सोशल मीडियावर व्हायरल झालेल्या व्हिडीओत ज्याने तरुणीशी गैरवर्तन केले होते, त्याला अटक करण्यात आली आहे. त्याच्याविरुद्ध संबंधित कलमांखाली गुन्हा दाखल करण्यात आला आहे. त्याला न्यायालयात हजर केले जाईल, अशी माहिती पोलिसांनी दिली आहे.