मनोज जैस्वाल, साम टीव्ही, प्रतिनिधी

Washim News : वाशिममधून एक धक्कादायक माहिती समोर आली आहे. वाशिमच्या कारंजा तालुक्यातील एका शाळेत एका शिक्षकाने दोन विद्यार्थीनींचा विनयभंग केल्याची घटना घडली आहे. या प्रकरणी पोलिसांनी शिक्षकाच्या विरुद्ध गुन्हा दाखल केला आहे. आरोपी शिक्षक फरार असून त्याचा पोलीस शोध घेत आहेत.

मिळालेल्या माहितीनुसार, पिंप्री फॉरेस्ट येथील शाळेतून दोन्ही मुली दहावी बोर्डाचा पेपर लिहून घरी जाण्यासाठी निघाल्या होत्या. रस्त्यावर थांबलेल्या या दोन्ही मुलींना शाळेच्या मुख्याध्यापकांनी शिक्षक गजानन याच्या कारमधून घरी जाण्यास सांगितले. मुख्याध्यापकांचे ऐकून मुली कारमध्ये बसायला तयार झाल्या.

कार कामटवाडा गावापर्यंत गेल्यानंतर शिक्षकाने दोन्ही विद्यार्थींनीशी अश्लील चाळे करत त्यांचा विनयभंग केला. गाडीत इतर दोन शिक्षकही बसलेले होते. गजानन याच्या कृतीला त्यांनी विरोध केला. ते शिक्षक कारमधून खाली उतरले आणि त्यांनी दोन्ही मुलींनाही कारमधून बाहेर उतरवले. त्यानंतर ऑटो करुन मुलींना त्यांनी घरी सोडले.

घरी पोहोचल्यावर दोन्ही मुलींनी आपापल्या पालकांना या घटनेविषयी सांगितले. मुलींच्या पालकांनी कारंजा ग्रामीण पोलीस ठाण्यात गाठले आणि शिक्षकाच्या विरोधात तक्रार दाखल केली. या घटनेपासून आरोपी शिक्षक फरार असल्याची माहिती पोलिसांनी दिली आहे. त्याच्या विरुद्ध गुन्हा दाखल करण्यात आला असून पोलीस त्याचा शोध घेत आहेत.