अमर घटारे, साम टीव्ही अमरावती

एसटी बसची वाट पाहत असलेल्या एका 15 वर्षीय विद्यार्थिनीला सरपंचाच्या मुलाने लिफ्ट देण्याच्या बहाण्याने दुचाकीवर बसवले. त्यानंतर सुसाट वेगाने दुचाकी जंगलाच्या दिशेने नेली. तिथे अंधाराचा फायदा घेत तिच्यावर लैंगिक अत्याचार केला. ही संतापजनक घटना अमरावती जिल्ह्यातील मार्डी परिसरात शनिवारी रात्री साडेआठ वाजेच्या सुमारास घडली.

याप्रकरणी कुऱ्हा पोलिसांनी आरोपीविरोधात गुन्हा दाखल करत त्याला अटक केली आहे. या घटनेनं परिसरात संतापाची लाट उसळली आहे. पोलिसांनी दिलेल्या माहितीनुसार, पीडित विद्यार्थिनी नववीच्या वर्गात शिकते. गावापासून शाळा दूर असल्याने दररोज ती एसटी बसने प्रवास करते.

शनिवारी सायंकाळी पीडित विद्यार्थिनी बस स्टँडवर बसची वाट पाहत उभी होती. यावेळी गावातील सरपंचाचा मुलगा तिथे आला. आता बस येणार नाही, मी पण गावाकडे निघालो आहे, असं म्हणत त्याने पीडितेला दुचाकीवर बसण्यास म्हटले.

तेव्हा पीडित विद्यार्थिनीने सुरुवातीला नकार दिला. मात्र, बराच वेळ वाट पाहूनही बस आली नसल्याने तिने आरोपीच्या मोबाइलवरून आपल्या आई-वडिलांना फोन केला. बस मिळत नसल्यामुळे मी सरपंचाच्या मुलासोबतच घरी येत असल्याची माहिती पीडितेने आपल्या कुटुंबियांना दिली.

पीडितेला दुचाकीवर घेऊन आरोपी गावाकडे निघाला. मात्र, वाटेतच त्याची नियत फिरली. रात्रीच्या अंधाराचा फायदा घेऊन त्याने गाडी जंगलाच्या दिशेने नेली. तिथे पीडितेला जीवे मारण्याची धमकी देत आरोपीने तिच्यावर लैंगिक अत्याचार केला.

अत्याचारानंतर आरोपीने तिला घरी आणून सोडले. घरी येताच पीडितेने घडलेला प्रकार आपल्या आई-वडिलांना सांगितला. त्यांनी तातडीने पोलिसांत धाव घेत तक्रार दाखल केली. याप्रकरणी पोलिसांनी गुन्हा दाखल केला असून आरोपीला अटक केली आहे.