छत्रपती संभाजीनगर, ता. २५ जून २०२४

भाडेकरुच्या त्रासाला वैतागून वृद्ध दांपत्याला रात्रभर घराबाहेर झोपावे लागल्याचा धक्कादायक प्रकार छत्रपती संभाजीनगर शहरातील सिडको वन या उच्चभ्रू वसाहतीत घडला. भाडेकरूकडून होत असलेल्या त्रासाबद्दल अनेक वेळा तक्रारी करूनही कारवाई होत नसल्याने हे पाऊल उचलल्याचे या जोडप्याने सांगितले आहे.

याबाबत सविस्तर माहिती अशी की, एलीझाबेथ बत्रा (वय, ७०) आपल्या ७६ वर्षीय पतीसोबत छत्रपती संभाजीनगर शहरातील सिडको एन-१ परिसरात राहतात. २०२० मध्ये त्यांनी एका व्यक्तीला घरासमोरील जागा किराणा, डेली निड्स व्यवसायासाठी भाड्याने दिली. मात्र आता हा करार संपल्यानंतरही भाडेकरुन जागा सोडत नसल्याचे त्यांनी आपल्या तक्रारीमध्ये म्हटले आहे.

एलीझाबेथ यांच्या तक्रारीनुसार, सप्टेंबर २०२३ पर्यंत त्यांनी रीतसर लिव्ह अँड लायसन्सचा करार केला होता. जून २०२३ मध्ये त्यांनी संबंधित भाडेकरूला जागा खाली करण्याची नोटीस दिली होती. मात्र सप्टेंबर उलटल्यानंतर त्याने ही जागा सोडली नाही. याबाबत वृद्ध दांपत्याने पोलिसांकडे वारंवार तक्रार केली.

पोलिसांकडून दखल न घेतली गेल्याने त्यांनी न्यायालयातही धाव घेतली, मात्र न्याय मिळत नसल्याने त्यांनी अखेर सोमवारी रात्री घराबाहेर झोपून आंदोलन सुरू केले. ही बाब कळताच एमआयडीसी सिडको पोलिसांनी घटनास्थळी धाव घेतली. रात्री उशिरापर्यंत पोलिस त्यांची समजूत काढली. मात्र ते आपल्या आंदोलनावर ठाम राहिले.