Buldhana Crime News

संजय जाधव

बुलढाणा जिल्ह्यातील शेगाव शहरात एका उच्चभ्रू वस्तीत मातृत्वाला काळीमा फासल्याची घटना उघडकीस आली आहे. निर्दयी आईनेच आपल्या एक दिवसांच्या जिवंत अर्भकाला फेकून दिले आहे. धक्कादायक म्हणजे या स्री जातीच्या अर्भकाचा एक पाय कापलेल्या स्थितीत आढळून आल्यामुळे संताप व्यक्त होत आहे. दरम्यान पोलिसांनी मृत अर्भक ताब्यात घेतले असून गुन्हा दाखल केला आहे.

पोलिसांनी दिलेल्या माहितीनुसार, शेगाव शहरातील रेल्वे रूळानजीक असलेल्या लखपती गल्लीत रस्त्याच्या बाजूला स्री जातीचे अर्भक आढळून आले होते. धक्कादायक म्हणजे अर्भकाचा एक पाय कापलेल्या स्थितीत होता. त्यानंतर परिसरातील नागरिकांनी याची माहिती पोलिसांना दिली. पोलिसांनी तात्काळ घटनास्थळी धाव घेतली आणी मृत अर्भक ताब्यात घेतले आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

अनैतिक संबंधातून बाळ जन्माला आल्यामुळे ते निर्जनस्थळी फेकून दिले असावे, असा संशय पोलिसांना आहे. तसेच बाळाला रात्री या ठिकाणी फेकून दिल्यानंतर कुत्र्यांनी बाळाच्या पायाचे लचके तोडले असावेत असाही अंदाज व्यक्त करण्यात आला आहे. दरम्यान आईनेच पोटच्या मुलाला अशा प्रकारे फेकून दिल्यामुळे हळहळ व्यक्त होत आहे. पोलिसांनी याप्रकरणी अज्ञाताविरोधात गुन्हा दाखल केला असून या संदर्भात कोणाला माहिती मिळाल्यास शेगाव शहर पोलीस स्थानकात संपर्क करण्याचे आवाहन पोलिसांनी केले आहे.