अमरावती जिल्ह्यातून धक्कदायक बातमी समोर आली आहे. लग्नासाठी प्रियसीला मुलगा बघायला आल्याने प्रियकराने प्रियसीच्या कुटुंबावर जीवघेणा हल्ला केल्याची घटना घडली आहे. ही घटना मंगळवारी रात्री घडली असून मुलीच्या कुटुंबाने प्रियकर विरोधात पोलीस ठाण्यात तक्रार नोंदवली आहे. या घटनेनंतर परिसरात खळबळ उडाली आहे.

मिळालेल्या माहितीनुसार, आरोपी तरुणाचा या मुलीशी प्रेमसंबंध होते. या काळात काही महिन्यांपूर्वी त्याने तिला सोबत घेऊन थेट तेलंगणात पळ काढला होता. या घटनेमुळे मुलीच्या कुटुंबीयांना मोठा धक्का बसला होता. त्यानंतर पोलीस यंत्रणेच्या मदतीने मुलीला सुरक्षित परत आणण्यात आले आणि ती आपल्या आई-वडिलांकडे परतली. यानंतर कुटुंबीयांनी मुलींसाठी स्थळ पाहण्यास सुरुवात केली.

दरम्यान, काल त्या मुलीसाठी कांदेपोह्यांचा कार्यक्रम योजला होता. या घटनेची माहिती आरोपी प्रियकराला मिळताच तो संतापला. संतापलेला प्रियकर रात्री उशिरा तो आपल्या साथीदारांसोबत मुलीच्या घरी धडकला. त्यावेळी मुलगी, तिचे आई-वडील आणि नातेवाईक घरातच उपस्थित होते. या दरम्यान मुलीच्या वडिलांमध्ये आणि प्रियकरामध्ये शाब्दिक बाचाबाची झाली. मात्र ही शाब्दिक बाचाबाची हाणामारीत बदलली.

या हाणामारीत मुलीचे कुटुंबीय गंभीर जखमी झाले. त्यांनी तडक पोलीस स्टेशनमध्ये धाव घेत आरोपी प्रियकर विरोधात पोलीस ठाण्यात तक्रार नोंदवली. ही घटना अमरावती जिल्ह्यातील तिवसा तालुक्यातील कुऱ्हा पोलीस स्टेशनच्या हद्दीत घडली आहे. या घटनेप्रकरणी पोलीस पुढील तपास करत असून आरोपी प्रियकर आणि त्याचे साथीदार अद्यापही बेपत्ता आहेत.