एकीकडे 'मुलगी वाचवा मुलगी शिकवा' च्या घोषणा दिल्या जातात. ,मात्र दुसरीकडे तिचं मुलगी नकोशी असल्यामुळे तिला जीवे मारलं जात. वंशाच्या दिव्याच्या हव्यासापोटी पणतीला उजळू दिलं जात नाही. अशीच एक घटना बिहारमध्ये घडली आहे. जन्मदात्याने मुलाच्या हव्यासापोटी जन्माला आलेल्या मुलीला गळा दाबून जीवे मारले आहे.

बिहारमधील जमुई येथील सिकंदरा नगर परिसरातील पुराणी चौकात शुक्रवारी मन्नू चौधरी या नराधम बापाने दीड वर्षाच्या मुलीला जीवे मारलं आहे. तो पुराणी चौकातील रहिवासी आहे. मुलगा व्हावा या इच्छेपोटी त्याने त्याची दीड वर्षांची निष्पाप मुलगी अनुराधा उर्फ ​​लाडो हिची हत्या केली आहे. या घटनेची माहिती पोलिसांना देण्यात आली. दरम्यान पोलिसांनी घटनास्थळी पोहोचून आरोपीला अटक केली.

मुलीची आई पूनम कुमारी यांनी सांगितल्याप्रमाणे, त्या शुक्रवारी सकाळी भांडी धुत होती. त्यानंतर तिचा पती मन्नू चौधरीने तिला ढकलून खाली पाडले आणि तिची दीड वर्षांची मुलगी लाडोचा गळा दाबून खून केला. तिने गोंधळ घातला तेव्हा आजूबाजूचे लोक जमले.

माहिती मिळताच पोलिसांनी घटनास्थळी पोहोचून आरोपी मन्नू चौधरीला अटक केली. महिलेने तक्रार केली आहे की मुलीची हत्या तिच्या पतीनेच केली आहे. तिला मुलगा नसल्याने ही हत्या करण्यात आल्याचे सांगण्यात आले आहे. दरम्यान पोलीस या घटनेचा अधिक तपास करत आहेत.