बिहारच्या नालंदामधून संतापजनक घटना समोर आली आहे. भररस्त्यात महिलेला गाठून तीन तरुणांनी तिच्यावर बलात्कार करण्याचा प्रयत्न केला. धक्कादायक म्हणजे तिचे कपडे फाडून चित्रीकरण करून ते सोशल मीडियावर टाकण्यात आल्याचे उघड झाले आहे. याप्रकरणी पोलिसांनी गुन्हा दाखल करून दोघांना अटक केली असून, एक जण अद्याप फरार आहे. या घटनेमुळे संपूर्ण परिसरात संतापाची लाट उसळली आहे.

मिळालेल्या माहितीनुसार, पीडित महिला विवाहित असून ती तिच्या आई-वडिलांच्या घरी राहत होती. २६ मार्च रोजी, सायंकाळी ६ ते ७ च्या दरम्यान, ती किराणा सामान घेऊन घरी परत येत असताना तिन्ही आरोपींनी तिला पकडले. तिने प्रतिकार केल्यावर त्यांनी तिला जमिनीवर पाडले आणि तिचे कपडे फाडले.

तेव्हा त्या महिलेने आरडाओरडा केला. पीडितेच्या आवाजाने आजूबाजूची मंडळी जमा झाले, परंतु आरोपींच्या आक्रमक स्वभावामुळे कोणीही उघडपणे त्यांना विरोध करू शकले नाही. आरोपींनी पीडित महिलेचा सगळ्यांसमोर छळ केला आणि सोशल मीडियावर दोन व्हिडिओ शेअर केले.

नूरसराई पोलीस ठाण्याच्या प्रमुखांनी सांगितले की, गुन्हा दाखल करण्यात आला असून फरार आरोपींना अटक करण्यासाठी पोलीस तपास सुरु आहे. अशोक यादव, मातृ महतो आणि रविकांत कुमार अशी आरोपींची नावे आहेत. पोलिसांनी कारवाई करत मातृ महतो आणि अशोक यादव यांना अटक केली असून, तिसरा आरोपी रविकांत कुमार याचा शोध सुरू आहे.