बिहारमधून धक्कादायक प्रकार समोर आला आहे. एका अल्पवयीन मुलीच्या बॉयफ्रेंडने तिला घरी बोलावून मित्रांसमवेत सामूहिक बलात्कार केला असल्याची संतापजनक घटना घडली आहे. या प्रकरणानंतर पीडित मुलगी एका मंदिराजवळ बेशुद्ध अवस्थेत सापडली. शुद्धीवर येताच तरुणीने सांगितलेल्या जबाबानुसार पोलिसांनी आरोपीला अटक केली.

मिळलेल्या माहितीनुसार, बिहारमधील मधेपुरा येथील सिंहेश्वर येथे रविवारी संध्याकाळी एका मंदिराजवळ एक अल्पवयीन विद्यार्थिनी बेशुद्ध अवस्थेत आढळली. स्थानिकांनी तिला तातडीने रुग्णालयात नेले, जिथे तिची प्रकृती गंभीर असल्याने तिला उच्च रुग्णालयात रेफर करण्यात आलं.

दोन दिवस बेशुद्ध राहिल्यानंतर, पीडितेने पोलिसांना घडलेल्या घटनेबाबत सांगितलं. मुलीने बुधवारी सांगितलं की, तिच्या बॉयफ्रेंडने तिला लग्नाचे आमिष दाखवून घरी बोलावले. त्यानंतर त्याच्या चार मित्रांसह तिच्यावर बलात्कार केला.

पीडित मुलीच्या जबाबावरून रोशन कुमार या तरुणाला अटक करण्यात आली आहे. पोलिसांनी पाच अज्ञात आरोपींविरुद्ध POCSO कायद्यांतर्गत गुन्हा दाखल केला. दरम्यान या घटनेचा सखोल तपास पोलीस करत असून पुन्हा एकदा मुलींच्या सुरक्षिततेवर प्रश्न उपस्थित करण्यात आला आहे.