विनोद जिरे

Beed Crime News:

बीडमधील गुन्हेगारीच्या घटना दिवसेंदिवस वाढत आहेत. आज मकरसंक्रात निमित्त सर्वत्र बाजारपेठा सजल्या आहेत. अनेक छोटे मोठे व्यावसायिक आपल्या मालाची विक्री करत आहेत. संक्रांतीसाठी सुगड्यांची विक्री देखील मोठ्या प्रमाणावर होते. या काळात होणाऱ्या व्यवसायावर कुंभाराचं पोट अवलंबून असतं. मात्र संक्रांतीच्या दिवशीच एक विचित्र घटना समोर आलीये.

बीडच्या परळी येथे ऐन संक्रांतीच्या दिवशीच शहरातल्या मुख्य बाजारपेठेत हाणामारी झाली आहे. यामुळे परिसरात तणावाचे वातावरण निर्माण झाले आहे. संक्रांतीसाठी वानवसाला वापरल्या जाणाऱ्या सुगड्यांची विक्री करणाऱ्या छोट्या व्यापाऱ्याला (कुंभाराला) एका टोळक्याने अचानक मारहाण केलीये. सदर घटनेमुळे परिसरात एकच खळबळ उडाली आहे.

बाजारपेठेत दहशतीचे वातावरण पसरले आहे. यादरम्यान टोळक्याच्या तावडीतून सुटून आपला जीव वाचवण्यासाठी कुंभाराने एका दुकानात धाव घेतली. कुंभाराला मारहाण करतानाचे दृश्य परिसरात असलेल्या सीसीटीव्ही कॅमेऱ्यात कैद झालेत. हा सीसीटीव्ही व्हिडीओ आता समोर आला आहे. दरम्यान या घटनेमुळे परळी शहरात काहीसं तणावाचं वातावरण निर्माण झालं असून परळी पोलिसांकडून शांततेचे आवाहन करण्यात आलं आहे.

आश्रमशाळेतील आदिवासी विद्यार्थ्यांला शिक्षकाने बेशुद्ध पडेपर्यंत केली बेदम मारहाण

पालघरमध्ये देखील अशीच एक संतापजनक घटना काल उघडकीस आली. यामध्ये आश्रमशाळेतील आदिवासी विद्यार्थ्यांला शिक्षकाने बेशुद्ध पडेपर्यंत बेदम मारहाण केली. पालघर जिल्ह्यातील मोखाडा तालुक्यातील कारेगाव येथील शासकीय आश्रमशाळेतील या घटनेमुळे परिसरात एकच खळबळ उडालीये.

इयत्ता 9 वीत शिकणारा विद्यार्थी रुद्राक्ष दत्ता पागी हा जेवण घेण्यासाठी गेला होता. यावेळी त्याने एक ऐवजी २ लाडू खाण्यासाठी घेतले. तेव्हा ललित अहिरे या शिक्षकाने त्याला गुराढोरा सारखी बेदम मारहाण केली. विद्यार्थी उपाशी असल्याने तो खाली कोसळला व बेशुद्ध झाला. बाहेर गेलेले अधिक्षक हे जेव्हा आश्रम शाळेत आले तेव्हा त्यांनी या विद्यार्थ्यांला रूग्णालयात घेऊन गेले. गरीब आदिवासी विद्यार्थी असल्याने यांच्या आई वडीलांवर दबाव टाकला जात आहे. शिक्षकांविरोधात तक्रार करु नये. मात्र नवीन शिकणारा रुद्राक्ष पागी हा शिक्षकाच्या माराने भेदरलेला आहे.