अंबरनाथ, ता. १२ जुलै २०२४

अंबरनाथमधील ऑर्डनस फॅक्टरीच्या अंबर चौकात २३ जूनच्या रात्री एका 25 वर्षीय तरुणाची निर्घृण हत्या केल्याची धक्कादायक घटना घडली होती. हत्येनंतर आरोपी फरार झाला होता. या प्रकरणी आता मोठी अपडेट समोर आली असून आरोपीला पोलिसांनी अटक केली आहे

समोर आलेल्या माहितीनुसार, जावसई येथे राहणारा सचिन भोसले याची २३ जुनच्या रात्री अंबरनाथमधील ऑर्डनस फॅक्टरीच्या अंबर चौकात त्याचा गळ्यावर, मानेवर आणि पोटावर वार करून हत्या झाल्याची धक्कादायक घटना घडली होती. घटनेची माहिती अंबरनाथ पोलिसांना मिळताच त्यांनी घटनास्थळी दाखल होत तपास सुरु केला होता.

फुटेजच्या आधारे ओळख पटवून पोलिसांनी पुणे जिल्ह्यातील मुळशी येथून आरोपी प्रविण चिंतोडिया याला अटक केली आहे. सचिन भोसले याने काढलेल्या टर्म लाइफ इन्शुरन्सचे पैसे हा आरोपी प्रविण भरत होता तसेच सचिनने काही पैसे हे प्रविणकडून उधार घेतले होते. टर्म लाइफ इन्शुरन्स आणि उधार घेतलेले पैसे प्रवीणने सचिनकडे मागितले होते.

मात्र आर्थिक अडचणीत असलेल्या सचिनकडे प्रविणला देण्यासाठी पैसे नव्हते. याच कारणावरून दोघांमध्ये वाद झाला आणि प्रविणने सचिनच्या गळ्यावर चाकू भोसकून त्याची हत्या केली असल्याची माहिती पोलीस उपायुक्त डॉ. सुधाकर पठारे यांनी पत्रकारांना दिली. याप्रकरणी आरोपी प्रविणला १७ जुलैपर्यंत पोलीस कोठडी सुनावली आहे.