सचिन बनसोडे, अहमदनगर|ता. २० जून २०२४

दोन महिन्यांपूर्वी नगर जिल्ह्यातल्या संगमनेर तालुक्यातील हिवरगाव पावसा येथे दोघा भावंडांचा शेततळ्यात बुडून मृत्यू झाल्याची घटना दुर्दैवी घडली होती. या घटनेने सर्वत्र हळहळ व्यक्त केली जात होती. मात्र हा अपघात नसून आईनेच प्रियकराच्या मदतीने पोटच्या दोन्ही मुलांचा जीव घेतल्याचे उघडकीस आले आहे. या घटनेच्या दोन महिन्यानंतर उघड झालेल्या या घटनेने संपूर्ण नगर जिल्हा हादरून गेला आहे.

याबाबत सविस्तर माहिती अशी की, संगमनेर तालुक्यातील हिवरगाव पावसा येथे शेततळ्यात बुडून रितेश सारंगधर पावसे ( वय 12 वर्ष) आणि प्रणव सारंगधर पावसे (वय 8 वर्ष ) या दोघा भावंडांचा दुर्दैवी मृत्यू झाला होता. एप्रिल महिन्यात ही घटना घडली होती. या घटनेने सर्वत्र हळहळ व्यक्त केली जात होती. मात्र मुलांच्या नातेवाईकांना याबाबत वेगळीच शंका होती.

वर्षभर अगोदर या मुलांच्या वडिलांचा मृत्यू झाला होता त्यामुळे त्यांचा सांभाळ आई करत होती. मुलांच्या मृत्यूनंतर नातेवाईकांनी हा घातपात असल्याचा संशय व्यक्त केला होता. नातेवाईकांच्या संशयावरुन पोलिसांनीही याप्रकरणत सखोल तपास सुरू केला. ज्यानंतर या प्रकरणात सर्वात खळबळजनक खुलासा झाला.

पोलिसांनी सखोल तपास केला असता मुलांची आई कविता सारंगधर पावसे हिचे सचिन बाबाजी गाडे याच्याशी प्रेमसंबंध असल्याचे उघडकीस आले. या प्रेमसंबंधात मुले अडसर ठरत असल्यानेच आईने प्रियकर सचिन बाबाजी गाडे याच्या मदतीने आपल्या मुलांना शेततळ्यात बुडवून मारल्याचे स्पष्ट झाले. याप्रकरणी पोलिसांनी खुनाचा गुन्हा दाखल करत दोघांना गजाआड केले आहे.