अहिल्यानगर जिह्यातील लोणी पोलिस ठाण्याच्या हद्दीत येणाऱ्या कोल्हार गावात पोलीस हवालदार रात्री दुकान बंद करण्याच्या नावाखाली दुकानदाराला मारहाण करत असल्याचा व्हिडिओ समोर आला आहे. तक्रार घेतली जात नाही म्हणून निर्भय महाराष्ट्र पार्टीच्या महिला जिल्हाध्यक्षा पोलीस ठाण्यात विचारणा करण्यासाठी गेल्या असता त्यांना पोलीस ठाण्यातच बेदम मारहाण करत जिवे मारण्याची धमकी देण्यात आली. या सगळ्या प्रकारामुळे, कायद्याचे रक्षण करणारेच सामान्य जनतेवर गुंडागर्दी करत आहेत का? असा प्रश्न निर्माण झाला आहे.

राहाता तालुक्यातील कोल्हार गावात रात्री दहा वाजता सर्व दुकाने बंद करण्याचा निर्णय काही दिवसापूर्वी घेण्यात आला. त्यानुसार सर्वसामान्य दुकानदार रात्री आपली दुकाने बंद करत असतात. ९ सप्टेंबर रोजी रात्री दहा वाजेच्या सुमारास केक शाॅप दुकानदार कैलास पिलगर यांना सिव्हिल ड्रेसवर आलेल्या एका हवालदाराने मारहाण केल्याचं सिसिटिव्ही कॅमेऱ्यात कैद झालं आहे. इतरांनाही दुकाने बंद करायला लावा एव्हढं म्हटल्याने या पोलीसाने मारहाण केल्याचा आरोप पिलगर यांनी केला असून पोलीसाविरोधात तक्रारही घेतली जात नसल्याचं म्हटलं आहे.

या संदर्भात लोणी पोलीस ठाण्यात विचारणा करण्यासाठी गेलेल्या निर्भय महाराष्ट्र पार्टीच्या जिल्हाध्यक्षा शितल गोरे यांच्यासह एकाला पोलीस ठाण्यात बेदम मारहाण करत चारतास डांबून ठेवण्यात आल्याचा आरोप गोरे यांनी केलाआहे. या प्रकरणाची कुठे वाच्यता केल्यास मुलासह तुला जिवे मारून टाकू अशी धमकी पोलीस अधिकाऱ्यांनी दिल्याचा गंभीर आरोप शितल गोरे यांनी केला. तर संबंधित प्रकरणाची चौकशी करून दोषी पोलिस आणि अधिकाऱ्यांना बडतर्फ करण्याची मागणी निर्भय महाराष्ट्र पार्टीचे जितेंद्र भावे यांनी केली आहे.

दरम्यान वरिष्ठ पोलीस अधिकाऱ्यांनी दुकानदाराला झालेल्या मारहाण प्रकरणाच्या चौकशीचे आदेश दिले असले तरी दुसरीकडे शीतल गोरे यांनी केलेल्या आरोपांची देखील निष्पक्ष चौकशी होऊन सत्य बाहेर येणे गरजेचे आहे. या प्रकरणानंतर कायद्याचे रक्षकच आता वर्दीच्या आविर्भावपायी सामान्य जनतेवर अरेरावी करत आहेत का ? असा प्रश्न उपस्थित होत आहे.