उत्तर प्रदेशात मुलींसाठी सरकार विविध योजना राबवत आहेत. या योजनांचा लाभ सामान्य घरातील मुलींना होतो. उत्तर प्रदेशात सरकार मिशन शक्ती ५.O अंतर्गत मुख्यमंत्री कन्या सुमंगला योजना राबिवण्यात येत आहे. मुख्यमंत्री कन्या सुमंगला योजना ही खरंतर उत्तर प्रदेशातील सरकारची योजना आहे. जी मुलींच्या विकासासाठी आणि शिक्षणासाठी आर्थिक मदत करते. या योजनेअंतर्गत, मुलींच्या जन्मापासून ते १८ वर्षांपर्यंत विविध टप्प्यांवर आर्थिक सहाय्य दिले जाते. २०२४ पर्यंत सुमारे १० लाख कुटुंबाने या योजनेचा लाभ घेतला होता.

मुख्यमंत्री कन्या सुमंगला योजना नक्की आहे तरी काय?

उत्तर प्रदेशात मुलींना सक्षम बनवण्याच्या उद्देशाने २०१९मध्ये मुख्यमंत्री कन्या सुमंगला योयना सुरू करण्यात आली. मुलींच्या कुटुंबांना आर्थिक लाभ देण्यासाठी उत्तर प्रदेशचे मुख्यमंत्री योगी आदित्यनाथ यांनी मार्च २०१९ साली ही योजना जाहीर केली होती. १ एप्रिल २०१९ रोजी ही योजना लागू करण्यात आली आहे.

सुमंगला योजनेचे फायदे

कन्या सुमंगला योजनेअंतर्गत मुलींच्या बँक खात्यात ६ श्रेणींमध्ये पैसे जमा होतात. तसेच पीएफएमएसद्वारे पैसे थेट बँक खात्यात जमा होतात.

जन्म झाल्यावर: पहिल्या मुलीच्या जन्मानंतर ५००० रूपये दिले जातात.

एक वर्षाची झाल्यावर: २००० रूपये दिले जातात.

पहिल्या वर्गात प्रवेश मिळाल्यावर: ३०००

सहावीच्या वर्गात प्रवेश मिळाल्यावर: ३०००

नववीच्या वर्गात प्रवेश घेताना: ५०००

दहावी अन् बारावी उत्तीर्ण झाल्यावर: ७०००

मुलीच्या खात्यात एकूण २५ हजार जमा होतील.

कुणाच्या खात्यात पैसे जमा होतील?

जर अर्जदार १८ वर्षांचा नसेल तर हे पैसे थेट आईच्या खात्यात जमा होतील. जर आईचे निधन झाले तर, पैसे वडिलांच्या खात्यात जमा केले जातील. तसेच जर अर्जदार १८ वर्षांचा असेल तर, हे पैसे थेट मुलीच्या बँक खात्यात जमा होतील.

पात्रता:

मुलगी आणि तिचे पालक उत्तर प्रदेशचे रहिवासी असणे आवश्यक आहे.

एका कुटुंबातील २ मुलींसाठी ही योजना लागू.

योजनेसाठी अर्ज करताना कुटुंबाचे उत्पन्न ३ लाख रूपयांपैक्षा जास्त नसावे.

मुलीचे वय ० ते १८ वर्षे असावे.

अर्ज करण्याची प्रक्रिया

मुख्यमंत्री कन्या सुमंगला योजनेचा लाभ घेण्यासाठी तसेच अर्ज करण्यासाठी उत्तर प्रदेशच्या अधिकृत वेबसाइटला भेट देऊन आपण अर्ज करू शकता.