युनिफाइड पेमेंट्स इंटरफेस (UPI) वापरणाऱ्यांसाठी मोठा बदल जाहीर झाला आहे. नॅशनल पेमेंट्स कॉर्पोरेशन ऑफ इंडिया (NPCI) ने मोठ्या व्यवहारांच्या मर्यादा वाढवल्या असून, १५ सप्टेंबर २०२५ पासून हे नियम लागू झाले आहेत. यानुसार, व्हेरिफाइड मर्चंटसोबत एका दिवसात आता १० लाख रुपयांपर्यंत ऑनलाइन पेमेंट करता येतील.

हा बदल शेअर बाजारातील गुंतवणूक, विमा प्रीमियम, क्रेडिट कार्ड बिल, कर्ज ईएमआय यांसारख्या ऑनलाइन व्यवहारांसाठी लागू होईल. फोनपे(Phone Pay), पेटीएम(Patym), गूगल पे(Google Pay) यांसारख्या UPI अ‍ॅप्सवर आता मोठ्या पेमेंटसाठी वारंवार व्यवहार करण्याची गरज नाही, त्यामुळे पेमेंट प्रक्रिया अधिक जलद आणि सोपी होणार आहे.

दोन व्यक्तींमधील पर्सन-टू-पर्सन व्यवहाराची मर्यादा मात्र पूर्ववत १ लाख रुपये दररोज राहणार आहे. यामुळे व्यक्तीगत व्यवहारांवर काही बदल होणार नाही. UPI अ‍ॅप्सच्या दैनंदिन किंवा तासिक मर्यादा देखील कायम राहतील, त्यामुळे यूजर्ससाठी हा बदल फायदेशीर ठरेल.

आधी फोनपे वापरणाऱ्यांसाठी किमान KYC असलेल्या यूजर्सना दररोज ₹१०,००० ट्रान्सफर करता येत होते, तर पूर्ण KYC यूजर्ससाठी प्रति व्यवहार ₹२ लाख आणि दररोज ₹४ लाख व्यवहार करता येत होते. पेटीएमवर दररोज ₹१ लाख, प्रति तास ₹२०,००० आणि प्रति तास जास्तीत जास्त ५ व्यवहार करता येत होते. गूगल पेवर दररोज ₹१ लाख आणि जास्तीत जास्त २० व्यवहार करता येत होते.

नवीन नियमांनुसार क्रेडिट कार्ड बिल भरण्यासाठी UPI ची एक-वेळची व्यवहार मर्यादा आता ५ लाख रुपये असून, एका दिवसात जास्तीत जास्त ६ लाख रुपये भरणे शक्य आहे. प्रवासाशी संबंधित पेमेंट देखील एका वेळी ५ लाख रुपयांपर्यंत करता येतील. कर्ज आणि EMI पेमेंटची मर्यादा प्रति व्यवहार ५ लाख रुपये करण्यात आली असून, एका दिवसात जास्तीत जास्त १० लाख रुपये भरणे शक्य आहे. यामुळे मोठ्या कर्ज, ईएमआय किंवा गुंतवणूक संबंधित व्यवहार सुलभ आणि जलद होणार आहेत.