सरकारकडून अनेक योजना राबवल्या जातात. ज्याचा फायदा सामन्य व्यक्तींना होतो. जर आपल्या सरकारी योजनेतून लाभ मिळवायचा असेल तर, अटल पेन्शन योजना आपल्यासाठी फायदेशीर ठरेल. या योजनेमध्ये गु्ंतवणूक केल्यास भविष्यात पेन्शन सुरू होईल. तसेच वृद्धापकाळात कुणाकडे हात पसरण्याची गरज भासणार नाही. या योजनेतून आपल्याला १००० ते ५००० रूपये पर्यंतची पेन्शन रक्कम मिळेल.

अटल पेन्शन योजना ही भारत सरकारद्वारे चालवली जाणारी आणि पेन्शन फंड नियामक आणि विकास प्राधिकरणाद्वारे चालवली जाणारी एक पेन्शन योजना आहे. बँक खाते किंवा पोस्ट ऑफिस खाते असलेला आणि खाजगी क्षेत्रात काम करणारा कोणताही भारतीय नागरिक या योजनेचा लाभ घेऊ शकतो. यासाठी वयोमर्यादा १८ ते ४० निश्चित करण्यात आली आहे. या योजनेत ६० वर्षानंतर पेन्शन मिळण्यास सुरूवात होईल.

दररोज करा ७ रूपयांची बचत

जर तुम्ही १८ वर्षापासून या योजनेत गुंतवणूक करण्यास सुरूवात केली, तर साठीनंतर आपल्याला पेन्शन मिळण्यास सुरूवात होईल. दरमहा ५००० रूपये पेन्शन मिळवण्यासाठी आपल्याला दररोज ७ रूपये म्हणजेच दरमहा २१० रूपये जमा करावे लागेल. तसेच जर नावनोंदणी केल्यानंतर ६ महिने पैसे जमा केले नाही तर, तुमचे खाते गोठवले जाईल.

अटल पेन्शन योजनेसाठी अर्ज करण्यासाठी बँक खाते आधार कार्डशी लिंक असणं गरजेचं आहे. याशिवाय योजनेसाठी अर्ज करण्यासाठी मोबाईल नंबर, आधार, ओळखपत्र, पत्ता पुरावा, पासपोर्ट आकाराचा फोटो इत्यादी कागदपत्रे देखील आवश्यक आहे. तुम्ही जवळच्या बँकेत जाऊन तुम्ही अटल पेन्शन योजनेअंतर्गत सहजपणे खाते उघडू शकता.