संजय महाजन, साम टीव्ही, प्रतिनिधी

दहावीच्या निकालात मुलींनीच बाजी मारल्याचे खान्देशच्या निकालावरून स्पष्ट झाले आहे, अशात जळगाव बालनिरीक्षणगृहातील एका मुलीने ८९ टक्के गुण मिळवून आपण अनाथ असूनही बाजीगर असल्याचे स्वतःला सिद्ध केले आहे. चाळीसगाव रेल्वे स्टेशनवर दहा वर्षांपूर्वी ही मुलगी बेवारस आढळून आली होती.

दहावीच्या ऑनलाइन निकालानंतर चांगल्या गुणांनी उत्तीर्ण झालेल्या मुलांचे शिक्षक आणि पालकांकडून कौतुक सुरू आहे. यश मिळवलेल्या मुलांच्या कुटुंबामध्ये आनंद साजरा होत आहे. तर दुसरीकडे जळगावच्या बालनिरीक्षणगृहात अनाथ असलेल्या एका मुलीने चक्क ८९ टक्के गुण मिळवून लक्ष वेधून घेतले आहे. या मुलीला आपले आई-वडील देखील आठवत नाहीत. दहावीतील यशानंतर तिने उच्च शिक्षणाची इच्छा व्यक्त केली आहे.

चाळीसगाव रेल्वेस्थानकावर साधारणपणे दहा वर्षांपूर्वी पूजा (नाव बदललेले) बेवारस स्थितीत मिळून आली. यानंतर सामाजिक संस्थेच्या मदतीने तिला बालनिरीक्षणगृहात दाखल करण्यात आले. निरीक्षणगृहाच्या वतीने तिला शहरातील प्रतिभाताई माध्यमिक विद्यालयात प्रवेश देण्यात आला. पूजाने निरीक्षणगृहातील कर्मचारी आणि सोबत असलेल्या मुलींनाच आपले कुटुंब बनवून त्यांच्यासोबत मिळून मिसळून राहणे सुरू केले.

पूजा अभ्यासात हुशार असल्यामुळे शाळेतदेखील तिची चुणूक दिसत होती. दहावीचा अभ्यास करण्यासाठी तिने स्वतः नियोजन केले. चांगला अभ्यास केला. अखेर या परीक्षेत शाळेतून पहिली येण्याचा मान मिळवला. ८९ टक्के मिळवून ती विशेष प्रावीण्यासह उत्तीर्ण झाली आहे. पुढे तिचा कॉम्प्युटर इंजिनिअरिंग करायचा मानस आहे. यासाठी निरीक्षणगृहाच्या माध्यमातून पुण्याच्या क्षमता संस्थेशी संपर्क करण्यात आला आहे. या संस्थेच्या मदतीने पूजाचे पुढील उच्च शिक्षण पूर्ण केले जाणार आहे. या निकालाबद्दल पूजाने आनंद व्यक्त केला असून, तिने भविष्यात उच्च शिक्षण घेऊन समाजासाठी कार्य करण्याची इच्छा व्यक्त केली आहे.