ओला इलेक्ट्रिकने अलीकडेच आयपीओ आणून शेअर बाजारात स्वत:ला सिद्ध केलं आहे. यासोबतच अनेक आयपीओ अजूनही रेसमध्ये आहेत. पण शेअर मार्केटमध्ये IPO ची सर्वाधिक चर्चा आहे ती फक्त 8 कर्मचारी असलेल्या कंपनीची. केवळ 8 कायम कर्मचारी असलेल्या कंपनीला 12 कोटी रुपयांच्या IPO साठी 4,800 कोटी रुपयांच्या बोली मिळाल्या आहेत, म्हणजेच थेट 400 पट सबस्क्रिप्शन.

रिसोर्सफूल ऑटोमोबाईलच्या अलीकडील IPO ची किंमत केवळ 11.99 कोटी रुपये होती. पण एकूण 400 वेळा सबस्क्राइब करण्यात आलं आहे. आश्चर्याची बाब म्हणजे या कंपनीच्या आयपीओमध्ये रिटेल क्षेत्रातील बोली 500 पट अधिक होती. त्यामुळे केवळ १.५२ कोटी नफा असलेल्या या कंपनीला IPO मध्ये 4800 कोटी रुपयांची बोली लागली आहे.

या कंपनीची विशेष गोष्ट म्हणजे दिल्लीत यामाहाची 'साहनी ऑटोमोबाइल' नावाची फक्त 2 शोरूम आहेत आणि कंपनीच्या कायम कर्मचाऱ्यांची संख्या केवळ 8 आहे. अशा परिस्थितीत एवढ्या छोट्या कंपनीचा आयपीओ इतका सबस्क्राइब होणे हा नियामकांसाठी चिंतेचा विषय बनतो. त्यामुळे आता छोट्या कंपन्यांचे (एसएमई) आयपीओ लॉन्च करण्याचे नियम अधिक कडक होऊ शकतात, असे संकेत बाजार नियामक सेबीनेही दिले आहेत.