सरकारने नागरिकांसाठी अनेक योजना राबवल्या आहेत. यातील काही योजना या महिला, शेतकरी आणि स्टार्टअपसाठी आहेत. देशातील शेतकऱ्यांसाठी प्रधानमंत्री किसान योजना राबवली आहे. प्रधानमंत्री किसान मानधन योजनेअंतर्गत शेतकऱ्यांना आर्थिक मदत केली जाते. ६० वर्षांपेक्षा जास्त वयोगटातील शेतकऱ्यांना दर महिन्याला पेन्शन दिले जाते. या योजनेला नुकतीच पाच वर्ष पूर्ण झाली आहेत. अनेक शेतकऱ्यांनी या योजनेचा लाभ घेतला आहे.

पीएम किसान मानधन योजनेअंतर्गत लहान आणि अल्प भूधारक शेतकऱ्यांना दर महिन्याला आर्थिक मदत केली जाते. वयाची ६० वर्ष पूर्ण झाल्यानंतर त्यांना दर महिन्याला ३००० रुपये निवृत्ती वेतन दिले जाते. म्हणजेच वर्षाला ३६,००० रुपये शेतकऱ्यांना दिले जातात.

पीएम किसान मानधन योजनेअंतर्गत १८ ते ४० वयोगटातील उमेदवार अर्ज करु शकतात. या योजनेत शेतकऱ्यांना दर महिन्याला ५५ ते २०० रुपये भरावे लागतात. ६० वर्ष पूर्ण होईपर्यंत हे पैसे भरावे लागतात. वयाची ६० वर्ष पूर्ण झाल्यानंतर नोंदणी झालेल्या शेतकऱ्यांना ३००० रुपये पेन्शन मिळते. (PM Kisan Mandhan Yojana)

२०१९ त्या नोंदणीप्रमाणे दोन हेक्टरपर्यंत लागवडयोग्य जमीन असलेले शेतकरी या योजनेचा लाभ घेऊ शकतात. आतापर्यंत २३.३८ लाख शेतकऱ्यांनी या योजनेचा लाभ घेतला आहे. या योजनेतून दर महिन्याला मिळणारी ठरावीक रक्कम दिली जाते. त्यामुळे वयोवृद्ध शेतकऱ्यांना आर्थिक मदत मिळते.

या योजनेसाठी अर्ज करण्यासाठी शेतकरी त्यांच्या जवळच्या कॉमन सर्व्हिस सेंटर (सीएसी) ला भेट देऊ शकतात. तसेच www.pmkmy.gov.in या वेबसाइटवरुन अर्ज करु शकतात.