Ladki Bahin Yojana August ₹1500 Installment : मुख्यमंत्री माझी लाडकी बहीण योजनेच्या ऑगस्ट महिन्याच्या हप्त्याची वाट पाहणाऱ्या राज्यातील महिलांसाठी एक अत्यंत महत्त्वाची बातमी समोर येत आहे. ऑगस्ट महिन्याचे १५०० रुपये लाडक्या बहिणींच्या बँक खात्यात नेमके कधी जमा होणार, याबाबत आज होणाऱ्या राज्य मंत्रिमंडळाच्या बैठकीत अंतिम निर्णय होण्याची दाट शक्यता आहे.

आज मुंबईत मुख्यमंत्री आणि दोन्ही उपमुख्यमंत्र्यांच्या प्रमुख उपस्थितीत राज्य मंत्रिमंडळाची महत्त्वाची बैठक पार पडणार आहे. या बैठकीत राज्यातील विविध विकासकामांसोबतच 'माझी लाडकी बहीण' योजनेसाठी आवश्यक निधी वर्ग करण्याबाबत आणि लाभाची तारीख निश्चित करण्यावर चर्चा होऊन महत्त्वाचा निर्णय घेतला जाण्याची शक्यता वर्तवली जात आहे.

गणेशोत्सवाच्या काळात मिळणार भेट?

शासकीय निर्णयानुसार (GR) दरमहा १० तारखेपर्यंत महिलांच्या खात्यात सन्माननिधीची रक्कम जमा करणे अपेक्षित आहे. सूत्रांकडून मिळालेल्या माहितीनुसार, जुलै महिन्याचा हप्ता ज्याप्रमाणे रक्षाबंधनाचे औचित्य साधून महिलांच्या खात्यात वर्ग करण्यात आला होता, त्याच धर्तीवर ऑगस्ट महिन्याचा हप्ता गणेशोत्सवाच्या काळात (गौरी-गणपती सणा दरम्यान) महिलांना दिला जाण्याची शक्यता आहे.

१६ सप्टेंबरनंतर खात्यात पैसे जमा होणार?

सूत्राने दिलेल्या माहितीनुसार, येत्या १६ सप्टेंबरनंतर टप्प्याटप्प्याने पात्र महिलांच्या बँक खात्यात ऑगस्ट महिन्याचे १५०० रुपये जमा करण्याची प्रक्रिया सुरू होऊ शकते. या निर्णयामुळे राज्यातील तब्बल १ कोटी ६६ लाख पात्र महिलांच्या खात्यात हा सन्माननिधी जमा होणार असून, आगामी गणेशोत्सवाच्या पार्श्वभूमीवर लाडक्या बहिणींना सरकारकडून मोठी आर्थिक भेट मिळण्याची शक्यता आहे.