सध्या महाराष्ट्रात मुख्यमंत्री माझी लाडकी बहीण योजना प्रचंड चर्चेत आहे. या योजने अंतर्गत लाभार्थी महिलांना दरमहा १५०० रुपये दिले जातात. या योजनेबाबत काँग्रेस विधिमंडळ पक्षनेते विजय वडेट्टीवार यांनी सरकारवर जोरदार टीका केली आहे. निवडणुकीमध्ये महिलांकडून मत मिळवण्यासाठी या योजनेचा वापर करण्यात आला आहे, पण सत्ता मिळाल्यानंतर सरकारने त्याच महिलांचा विश्वासघात केलाय असा आरोप विजय वडेट्टीवार यांनी केला .

विजय वडेट्टीवार म्हणाले, निवडणुकीआधी लाडक्या बहिणींची आठवण झाली, पण सत्ता मिळताच त्यांना वाऱ्यावर सोडण्यात आलंय. 80 लाख महिलांना अपात्र ठरवून सरकारने स्वत:ची जबाबदारी झटकलीये. या बहिणींचा तळतळाट महायुती सरकारला भविष्यात महाग पडेल." अशा प्रकारची टिका त्यांनी केली आहे.

सुत्रांच्या माहितीनुसार, लाडकी बहीण योजनेअंतर्गत ई-केवायसी आणि पात्रता पडताळणीनंतर जवळपास 80 लाख महिलांची नावं यादीतून वगळण्यात आली. सरकारच्या म्हणण्यानुसार, ज्या महिला योजनेसाठी अपात्र होत्या, ज्यांची अपूर्ण कागदपत्रे होती आणि ज्या महिलांनी ईकेवायसी केली नव्हती. त्यांना लाडकी बहीण योजनेतून वगळ्यात आलं आहे. तर विरोधकांनी याला महिलांशी केलेला विश्वासघात म्हटलं आहे.

विधान परिषद निवडणुकीत उद्योगपती आणि इतर पक्षांमधून आलेल्या नेत्यांना उमेदवारी देण्यावर सुद्धा वडेट्टीवार यांनी भाजपवर निशाणा साधला आहे. भाजपने काँग्रेसमुक्त भारताचा नारा दिला होता, पण आज भाजपच काँग्रेसयुक्त झाली आहे. अनेक मुख्यमंत्री, आमदार आणि आता उमेदवारही काँग्रेसमधून भाजपमध्ये गेले आहेत, अशी टीका त्यांनी केली आहे.

दरम्यान, लाडकी बहीण योजनेतल्या पात्र महिलांना लाभ सुरू राहील. आता मे महिन्याचा हप्ता खात्यात कधी जमा होणार? याबद्दल लाडक्या बहीणींमध्ये चर्चा सुरु आहे. सुत्रांनी दिलेल्या माहितीनुसार, १० ते १५ जूनपर्यंत लाडक्या बहीणींना हप्ता मिळू शकतो.