Ladki Bahin Yojana August installment payment date : राज्यातील लाडक्या बहिणींसाठी एक आनंदाची आणि महत्त्वाची बातमी समोर आली आहे. येत्या सोमवारपासून संपूर्ण महाराष्ट्रात लाडक्या बाप्पाचे आगमन होत असून गणेशोत्सवाला मोठ्या उत्साहात सुरुवात होत आहे. या सण-उत्सवाच्या काळातच राज्यातील पात्र महिलांना राज्य सरकारकडून मोठे गिफ्ट मिळण्याची शक्यता वर्तवली जात आहे. पुढील ४ ते ५ दिवसांत 'मुख्यमंत्री माझी लाडकी बहीण' योजनेचा ऑगस्ट महिन्याचा १५०० रुपयांचा हप्ता महिलांच्या बँक खात्यात जमा होऊ शकतो, अशी माहिती खात्रीलायक सूत्रांकडून मिळाली आहे.

१ कोटी ६६ लाख महिलांना होणार फायदा

राज्यातील सुमारे १ कोटी ६६ लाख पात्र महिलांना या योजनेचा थेट लाभ मिळत आहे. नुकताच ऑगस्ट महिन्यात रक्षाबंधनाचा सण पार पडला. त्या वेळी सरकारने जुलै महिन्याचे पैसे महिलांच्या खात्यात वर्ग केले होते. आता गणेशोत्सवादरम्यान, विशेषतः 'गौरी आगमना'च्या मुहूर्तावर ऑगस्ट महिन्याचा १५०० रुपयांचा हप्ता जमा करून महिलांना मोठा दिलासा देण्याची तयारी सुरू असल्याचे समजते. १७ तारखेपासून लाडक्या बहि‍णींच्या खात्यात टप्प्या टप्प्याने हप्ता जमा होऊ शकतो.

एकत्र ३००० रुपये मिळण्याचीही शक्यता

सध्या तरी ऑगस्ट महिन्याच्या हप्त्याबाबत सरकारकडून कोणतीही अधिकृत घोषणा किंवा वक्तव्य आलेले नाही. मात्र, सूत्रांच्या माहितीनुसार, जर २० सप्टेंबरपर्यंत ऑगस्ट महिन्याचे पैसे महिलांच्या खात्यात जमा झाले नाहीत, तर महिलांनी अजिबात काळजी करण्याचे कारण नाही. अशा परिस्थितीत सप्टेंबर महिन्याच्या शेवटी किंवा ऑक्टोबर महिन्याच्या सुरुवातीला ऑगस्ट आणि सप्टेंबर या दोन्ही महिन्यांचे मिळून एकत्र ३००० रुपये महिलांच्या खात्यात पाठवले जाऊ शकतात.

महिलांचे लक्ष सरकार काय निर्णय घेणार याकडे

सध्या सर्वत्र गणेशोत्सवाची लगबग सुरू आहे. सणाच्या काळात घरात अनेक छोटे-मोठे खर्च असतात. अशा वेळी १५०० रुपयांची ही मदत महिलांसाठी अत्यंत मोलाची ठरणार आहे. त्यामुळे गौरी आगमनापूर्वी सरकार खात्यात पैसे जमा करून लाडक्या बहिणींना दिलासा देणार की दोन महिन्यांचा हप्ता एकत्र देणार, याकडे आता राज्यातील लाखो महिलांचे लक्ष लागून राहिले आहे.