आशियातील सर्वात श्रीमंत व्यक्ती मुकेश अंबानी आता देशवासीयांना नवीन सेवा देण्याच्या तयारीत आहेत. लोकांना त्यांच्या स्वप्नातील घर बनवण्यासाठी मदत करणार आहेत. अंबानींची एनबीएफसी (NBFC) जिओ फायनान्शिअल सर्विसेस कंपनी लवकरच गृह कर्ज सुरू करण्याची शक्यता आहे. कंपनीकडून यावर कामही सुरू करण्यात आलं असून काही महिन्यातचं कर्ज प्रक्रिया सुरू होण्याची शक्यता आहे. मुकेश अंबानी यांनी गेल्या वर्षीच एनबीएफसी जियो फायनान्शिअलची सुरुवात केली होती.

जिओ फायनान्शियल सर्व्हिसेसची नॉन बँकिंग वित्तीय कंपनी जिओ फायनान्शिअल सर्विसेसने शुक्रवारी सांगितलं की, गृह कर्ज सुरू करण्यासाटी कंपनी अंतिम टप्प्यात आहे. एका चाचणीच्या स्वरूपात (बीटा) सुरू करण्यात आलं आहे. याशिवाय कंपनी मालमत्तेवर कर्ज आणि रोख्यांवर कर्ज यांसारख्या इतर सेवा देखील देण्याचा विचार करत आहेत.

शुक्रवारी पहिल्या वार्षिक सर्वसाधारण सभेत (पोस्ट-लिस्टिंग) समभागधारकांना संबोधित करताना, कंपनीचे व्यवस्थापकीय संचालक आणि मुख्य कार्यकारी अधिकारी हितेश सेठिया यांनी यासंदर्भात माहिती दिली. गृहकर्ज लॉन्च करण्याच्या अंतिम टप्प्यात असून लवकरच सुरू केले जाईल. सध्या चाचणी आधारावर सुरू होत आहे. मालमत्तेवर कर्ज आणि रोख्यांवर कर्ज यासारख्या इतर सेवा देखील देण्यात येणार आहेत. जिओ फायनान्शिअल सर्विसेस लिमिटेडने आधीच पुरवठा साखळी वित्तपुरवठा, म्युच्युअल फंडांवरील कर्ज आणि उपकरणे वित्तपुरवठा करण्यासाठी एंटरप्राइझ सोल्यूशन्स यासारख्या सुरक्षित कर्ज सेवा कंपनीने ग्राहकांना उपलब्ध करून दिलेली आहेत.

शुक्रवारी जिओ फायनान्शिअलच्या शेअर्समध्ये एक टक्क्यांहून अधिक घसरण झाली होती. बीएसईच्या आकडेवारीनुसार, 1.21 टक्क्यांच्या घसरणीसह 321.75 अंकांनर बंद झाला. तसंच ट्रेडिंग सत्रादरम्यान कंपनीच्या समभागांची 320.50 रुपयांपर्यंत घसरण झाली. कंपनीच्या समभागांनी 331.60 रुपयांचा दिवसाचा उच्चांक गाठला. कंपनीचे मार्केट कॅप 2 लाख कोटी रुपयांपेक्षा जास्त आहे.