जर तुम्हाला ITR फाईल करून बरेच दिवस उलटून गेले असतील तर तुमच्यासाठी ही माहिती महत्त्वाची आहे. एका करदात्याने ३१ जुलै रोजी ITR फाईल केला आणि त्यांना २४ तासांच्या आत रिफंड सुद्धा मिळाला. पण तुम्हाला रिफंड आला नसेल, रखडलेला असेल तर त्याचे मुळ कारण तुम्ही जाणून घेतले पाहिजे.

इनकम टॅक्स डिपॉर्टमेंटच्या e-Filing या अधिकृत पोर्टलवर दाखवलेल्या आकडेवारीनुसार ४ ऑगस्टपर्यंत ६ कोटींपेक्षा जास्त रिटर्न फाइल करण्यात झाल्या आहेत. यामध्ये ५.६५ कोटींपेक्षा जास्त ITR पडताळणी आणि ३.६५ कोटींपेक्षा जास्त प्रोसेस झाल्या होत्या. आत्तापर्यंत मोठ्या संख्येने रिफंड जाहीर केले असतील, मात्र काहींना अजूनही रिफंड आलेला नाही.

रिफंड न येण्याचे कारण

CA संतोष मिश्रा म्हणतात की, आयकर विभागाकडून येणारा रिफंड बऱ्याचदा खात्यात येताना फेल होऊ शकतो. त्यामध्ये काही चुका आढळतात. करदात्याची माहिती चुकीची ठरू शकते, खात्याची स्थिती किंवा अपडेट नसते, मेल न येण्यामुळे तुमचा रिफंड अडकू शकतो. तसेच चुकीचे बँक खाते, चुकीचा खात्याचा नंबर , अपडेट न केलेलं खातं, ई-केवायसी न केलेले खातं असेल तर तुम्ही ही माहिती नीट तपासणं गरजेचं आहे. काही जण बंद खात्यांचा नंबर देतात. आयएफसी कोड चुकीचा देणे, पॅन कार्ड बँकेशी जोडलेले नसणे या सर्व कारणांमुळे तुमचा रिफंड बँक पास करू शकत नाही.

रिफंड मिळायला किती कालावधी लागतो?

तुमचा ITR प्रोसेस झाला असेल तरी लगेचच तुमच्या खात्यात रिफंड पाठवला जात नाही. काहीवेळेस २४ तासांच्या आत काहींना रिफंड दिला जातो. तर कधीकधी ४ किंवा ५ आठवड्यांचा कालावधी लागू शकतो. जर या कालावधीत रिफंड मिळाला नाही तर, करदात्यांनी त्यांच्या टॅक्स रिटर्नमधल्या अडचणींबद्दल त्यांना कोणतीही सूचना मिळाली आहे का, आयकर विभागाकडून आलेले ईमेल किंवा एसएमएस अलर्ट मेसेज तपासले पाहिजेत आणि आयकर-ई - फायलिंग पोर्टलवर परताव्याची स्थिती तपासली पाहिजे.