यूपीएससी ही देशातील सर्वात अवघड परीक्षा आहे. यूपीएससी परीक्षा देण्यासाठी दिवसरात्र मेहनत करावी लागते. अनेक आयएएस-आयपीएस ऑफिसर आहेत की ज्यांनी नोकरी करत यूपीएससी परीक्षा दिली आहे. असंच श्वेता भारती यांनीदेखील केले. त्यांनी प्रायव्हेट नोकरी करत यूपीएससी परीक्षा क्रॅक केली आहे.

यूपीएससी (UPSC) परीक्षा क्रॅक करण्यासाठी रोज १० आणि १२ तास अभ्यास करावा लागतो. मिडिया रिपोर्टनुसार, श्वेता भारती यांनी ९ तासांची नोकरी करत यूपीएससी परीक्षा क्रॅक केली आहे.

श्वेता भारती (IAS Shweta Bharti) या मूळच्या बिहारच्या नालंदा येथील रहिवासी आहेत.त्या लहानपणापासूनच अभ्यासात खूप हुशार होत्या. रिपोर्टनुसार, त्यांनी पाटणा येथील ईशान इंटरनॅशनल पब्लिक स्कूलमधून आपले शिक्षण पूर्ण केले. यानंतर त्यांनी भागलपूर इंजिनियरिंग कॉलेजमधून इलेक्ट्रिकल आणि टेलिकम्युनिकेशन इंजिनियरिंगमध्ये ग्रॅज्युएशन पूर्ण केले. ग्रॅज्युएशन पूर्ण झाल्यानंतर त्यांना विप्रो या कंपनीत नोकरी मिळाली.

विप्रो (Wipro) कंपनीत नोकरी करत असतानाच त्यांच्या डोक्यात सिव्हिल सर्व्हिसमध्ये जाण्याचा विचार आला. परंतु काही जबाबदाऱ्यांमुळे त्या नोकरी सोडू शकत नव्हत्या. त्यांनी ९ तासांची नोकरी करत अभ्यास केला. त्या शिफ्ट संपल्यानंतर रात्री अभ्यास करायच्या. नोकरीसोबत अभ्यास करणे हे खूप कठीण जायचे परंतु त्यांनी सतत प्रयत्न केले. त्यांनी स्मार्टफोन वापरणे पूर्णपणे सोडून दिले होते.

श्वेता भारती यांच्या मेहनतीचे यश त्यांना मिळाले. त्यांनी बीपीएससी परीक्षेत चांगले गुण मिळाले. परंतु आयएएस होणे हे त्यांचे स्वप्न होते. त्यामुळे त्यांनी यूपीएससी परीक्षा दिली. त्यांनी २०२१ मध्ये ३५६ रँक प्राप्त केली.