स्कोडा ऑटो(Skoda) इंडियाने घोषणा केली आहे की, २२ सप्टेंबरपासून जीएसटी(GST) दरांमध्ये झालेल्या बदलांनंतर ग्राहकांना त्यांच्या कारच्या खरेदीवर ३.२८ लाख रुपयांपर्यंतचे फायदे मिळणार आहेत. कंपनीचा विश्वास आहे की जीएसटी कपातीमुळे वाहने स्वस्त होतील आणि येत्या सणासुदीच्या हंगामात अधिक लोक सहजपणे स्कोडा कार खरेदी करू शकतील.

सध्या, स्कोडा २१ सप्टेंबरपर्यंत कुशक, स्लाव्हिया आणि कोडियाकवर विशेष ऑफर देत आहे, ज्यामुळे ग्राहकांना किमतीत लगेच कपातीचा फायदा मिळेल. पूर्वी ४ मीटरपेक्षा कमी कॉम्पॅक्ट एसयूव्ही कायलकवर जीएसटी आणि सेस २९% होता, जो आता १८% करण्यात आला आहे. यामुळे ग्राहकांना १,१९,२९५ रुपयांपर्यंत फायदा होईल. मध्यम आकाराच्या सेडान स्लावियावर जीएसटी आणि सेस ४५% होता, जो आता ४०% होईल, आणि त्यानंतर ग्राहकांना ६३,२०७ रुपयांपर्यंतचा फायदा मिळेल.

मिडसाईज एसयूव्ही कुशकवर ४५% जीएसटी आणि सेस लागू होती, जी आता ४०% करण्यात आली आहे, आणि २२ सप्टेंबरपासून ग्राहकांना ६५,८२८ रुपयांपर्यंतचा फायदा मिळणार आहे. फुलसाईज एसयूव्ही कोडियाकवर ५०% जीएसटी आणि सेस होती, जी आता ४०% करण्यात आली असून ग्राहकांना एकूण ३,२८,२६७ रुपयांपर्यंतचा फायदा मिळणार आहे.

स्कोडा ऑटो इंडियाचे ब्रँड डायरेक्टर आशिष गुप्ता म्हणतात की, भारत सरकारने जीएसटीमध्ये केलेला बदल ग्राहकांसाठी आणि उद्योगांसाठी चांगला पाऊल आहे. यामुळे कार खरेदी करणे सोपे होईल आणि ग्राहकांना आधुनिक डिझाइन, उच्च सुरक्षा आणि तंत्रज्ञानासह स्कोडा कारचा अनुभव घेता येईल. कंपनीने २१ सप्टेंबरपर्यंत कुशकवर ६६,००० रुपयांपर्यंत, स्लावियावर ६३,००० रुपयांपर्यंत आणि कोडियाकवर ३.३ लाख रुपयांपर्यंत अतिरिक्त सूट देण्याची ऑफर जारी केली आहे, ज्यामुळे सणासुदीच्या हंगामात कार खरेदी करणे अधिक आकर्षक ठरणार आहे.